【重新做人好過】林穎彤入行12年奪勁爆新人獎 慘遭媽咪揶揄

更新時間 (HKT): 2019.12.29 13:24

林穎彤(Bella)最近和信貸公司續任代言人合約,日前更帶病開工拍攝廣告造型照,她說:「連續影咗13個鐘,多謝團隊上下下都好照顧我。影咗好多唔同造型嘅硬照廣告,喺公共交通工具車身都會見到我嘅相,fans仲同我個廣告相影合照,send番畀我睇,身邊朋友都讚啲相影得好靚。」Bella最喜歡穿着制服的造型照,她笑說:「細細個成日幻想將來嘅工作,可以着制服返工,因為覺得着起制服有種使命感。」

另外,Bella今年首次以歌手身份參與樂壇頒獎禮,並在「新城勁爆頒獎禮2019」奪得首個勁爆新人獎,她笑言:「其實入咗行咁多年,仲話自己係新人,感覺好古怪,都用咗少少時間去適應呢個身份,但最搞笑係我媽咪,佢見我攞新人獎,居然話我:『吓!你仲拎新人獎?係咪重新做人獎呀?』我俾佢激到唔知好嬲定好笑。」

Bella坦言明白到下年要在樂壇爭取更多成績,必須加倍努力,因為不再是新人:「公司一直幫我揀緊歌,剛剛錄好咗同伍富橋嘅合唱歌,應該明年年初大家就可以聽到。」

娛聞樂陪你走遍全球追星,即Like「娛果」FB 專頁!
BannerBanner