【奶奶都上埋台】「大陸國民老公」陳偉霆閃金珠片Look 扭籮唱洗腦神曲

更新時間 (HKT): 2020.01.04 23:29

大陸歌手董寶石,去年歌曲《野狼DISCO》因騎呢廣東話發音及洗腦式曲風而爆紅,搞到喺大陸有「國民老公」之稱嘅「的士陳」陳偉霆,都要拍騎呢MV翻唱。剛過去嘅江蘇衛視跨年騷,的士陳更與原唱董寶石合作唱《野》,驚嚇程度,絕對不比MV遜色。

的士陳喺MV着黑Tee襯波褲,至於跨年騷,佢就着咗件閃片金色西裝外套襯黑衫黑皮褲、戴住黑超同攞住一支玫瑰出場,更擺出傾斜pose,咁符合國情嘅造形兼舉動,當然令佢一出場就惹來fans不停尖叫,搞到只係以西裝造型出現嘅董寶石,無論表現同打扮,都完全被的士陳比下去。

唱到一半,舞台上突然多咗一堆大媽上台伴舞,之後着住藍色外套、同樣帶黑超嘅陳媽媽忽然出現,的士陳將手上支玫瑰送畀阿媽之餘,更在阿媽面前狂扭籮,睇到台下fans熱血沸騰、瘋狂尖叫。而陳媽媽睇完阿仔扭籮後,亦交足戲地與阿仔同董寶石一起跳《野》嘅左行右行、揈吓手搖吓頭的簡單舞步。

另外,由的士陳、鍾漢良等主演的新片《寵愛》,在大陸上映5天,據「貓眼專業版-實時票房」資料顯示,截至今晚11時多,該片累積票房達4億人民幣(約4.46億港元),而今天的單日票房達4,723萬人民幣(約5,275萬港元),坐穩No.1位置。

娛聞樂陪你走遍全球追星,即Like「娛果」FB 專頁!
BannerBanner