【唔想有負擔】郭秀雲聞「新抱茶」即搖頭:等佢生埋腦囟先

更新時間 (HKT): 2020.01.06 15:04

為人父母都會渴望見到仔女早日成家立室,享受湊孫樂,景峰跟女友感情穩定,身為母親的郭秀雲卻表明不想太早飲新抱茶。郭秀雲、錢嘉樂、陸詩韻、冼國林師傅、曾醒明及黃榕等今日出席邱芷微與男友陳志忠及友人假西營盤開設的演藝學院揭幕禮。郭秀雲表示應兒子景峰邀請出席,據她所知兒子有投資少許在學院兼擔任武功夫導師,但因為出外拍戲未能出席,她說:「都開心見佢做正經嘢,大個仔諗到對社會有咩好貢獻,我就從事環保教育,佢就教運動,令人身體健康。」

新年願望會否想飲新抱茶?郭秀雲即答:「唔想呀!等佢生埋腦囟先,我自己唔得閒做阿嫲,等佢自己有好嘅基礎,唔係就變咗我負擔大咗。」她指男人要有事業才能兼顧其他方面,現時囝囝在電影事業上剛起步,應該專心事業先。郭秀雲日前從泰國探望完契媽返港,一落機便收到契媽急病入院,翌日便換了心血管,所以農曆年左右會再去泰國探望。

日前表示月中將飛往武漢參與群星演唱會的黃榕,昨晚收到主辦消息將會延期,詳情稍後通知,她說:「都買好晒機票,好可惜,賺少咗五位數,原本同行仲有梁焯滿同陳昭昭。」雖然失去賺錢機會,但始終是安全至上。

另外早前數臭蔡康年任司儀態度差,對方仍表示獲老闆讚好,邱芷微在新張儀式上對此不欲多談,但表示學院中有司儀課程,培養品德優良學生,正面處理事情,問到會否以蔡康年作為教材?她笑說:「反面教材?唔會啦,開學校唔好太是非。」

採訪、攝影:馬建華

娛聞樂陪你走遍全球追星,即Like「娛果」FB 專頁!
BannerBanner