【試吓囉】胡鴻鈞向周柏豪取經 搵機會用對白冧蔡思貝

更新時間 (HKT): 2020.01.08 14:52

胡鴻鈞今日到商台宣傳自己作曲的新歌《沒身份妒忌》,去年未有出新歌的他說:「19年上半年去咗拍劇,之後就因為『傻咗』要休息,新一年我正常返啦,仲聰明咗。」記者笑指他變聰明即媾女成功,胡鴻鈞笑謂:「媾女同聰明無關㗎,讀書嗰時仲多,而家少咗。」

緋聞女友蔡思貝有否聽過新歌?胡鴻鈞指不知道對方是否已經聽過,記者笑言他經常為蔡思貝做「柴可夫」,有否在車內播新歌給她聽?胡鴻鈞說:「嗰時都未有呢首歌,朋友應該知我出咗新歌啦,唔使咁刻意,同埋我知佢忙緊拍劇。」

問到胡鴻鈞會否出席18日舉行的勁歌金曲頒獎典禮?胡鴻鈞表示有沒有獎都會出席以示尊重:「我想有機會著靚啲,唔關今年有幾多個頒獎禮事。因為見到好多朋友,我好開心,又可以畀大家見到我出返嚟,等大家睇下我幾精神。」他表示看好偶像張敬軒和周柏豪,女歌手方面,絕對支持好友吳若希。

胡鴻鈞指有看電視劇《多功能老婆》,大讚周柏豪的角色很好:「Oppa(周柏豪角色名)真係好虐心,我都有私下短訊柏豪,真係好暖男,呢個世界幾乎冇可能出現。」問他有否學柏豪於劇中的冧女說話氹蔡思貝?他笑謂:「冇刻意記喎,現實中係咪有人講㗎?有機會試吓啦。」

至於他有份主演的電視劇《降魔的2.0》,何時播映?胡鴻鈞認為做演員很被動,但知道監製想把後期做得更好:「我睇trialer啲效果係逼真好多,我相信大家唔介意等,慢工出細貨。」

採訪、攝影:盧妹

娛聞樂陪你走遍全球追星,即Like「娛果」FB 專頁!
BannerBanner