【告別黎小田】薛家燕着合作戰衣演出 眼紅紅未放低摯友

更新時間 (HKT): 2020.01.10 22:17

一代音樂巨匠黎小田去年12月1日病逝,享年73歲。黎小田一班好友今晚於麥花臣場館舉行《To 小田With Love Forever 音樂會》悼念,演出嘉賓包括薛家燕、柳影虹、杜德偉和麥潔文等,並由陳欣健、胡諾言和陳敏之任司儀。

音樂會一開始先播出片段,當中包括黎小田已故作曲家父親黎草田生前聲帶,黎父指黎小田小時候經常拿着結他扮貓王唱歌,黎父的聲帶透露:「最初我好失望,試過唔畀佢彈結他,後來覺得唔可以咁對佢,之後鼓勵佢,等佢有自由發展。」片段中有黎小田跟昔日圈中友好合照,包括劉嘉玲、成龍、草蜢、梅艷芳、張國榮合照,及播出當年黎小田與薛家燕在麗的年代節目《家燕與小田》片段。片中指黎小田設靈當日有黑白蝴蝶在靈堂出現,相信是黎小田化成蝴蝶,而蝴蝶的黑白色正好代表琴鍵。

薛家燕今晚打頭陣出場唱《心肝寶貝》,唱到中段時她說大會特別叫她唱這首歌:「Michael(黎小田洋名),我今日特登着呢件衫,同埋唱呢首歌畀你聽,因為你真係我哋心肝寶貝,你為樂壇貢獻咗好多,我都好感激你,今日濟濟一堂,大家向你致敬,希望你得到安慰。」家燕姐其後接受訪問,指演出時所穿的裙,是曾跟黎小田合作時穿過,並跟蝴蝶出現的感覺差不多:「大會特別叫我唱《心肝寶貝》,我覺得着呢套衫好適合,好有意義。」說話至此,家燕姐一度眼紅紅,她續說:「感覺有如佢同我哋喺埋一齊。」會否覺得黎小田在場欣賞大家歌聲?家燕姐說:「我有感覺到,我都提住自己忍住,唔好有太大嘅情緒激動,都驚自己會喊。」

家燕姐表示當年與黎小田曾扮梅艷芳和張國榮唱《胭脂扣》,今晚她也會演唱這首歌,並播出當年二人合唱片段:「將Michael嘅畫面融入我嘅歌入邊,綵排時真係好似佢喺側邊伴住我。」問會否怕控制不住情緒而刻意不望黎小田螢幕影像?家燕姐再眼紅紅的說:「Michael走咗個幾月,坦白講我未釋懷,之前仔女帶我去外地旅行,叫我放低,開心番啲,Michael都係安詳,叫我唔好掛住,有時都會喺網上睇返同Michael合作,腦中浮現好多片段,一下子接受唔到佢走咗,我同自己講要盡量釋懷,但今日嚟到現場見到Clara(黎小田秘書),佢都話大家唔好企咁近,因為知道大家一見面會喊,但今日場面真係好感觸。今晚個騷會作慈善用途,捐畀啲年輕人學樂器,相信Michael知道都會釋懷。」

陳欣健任司儀外更主唱《大丈夫》,唱罷他指黎小田是真正大丈夫,忠於事業、藝術,而且對朋友很好。現場再播出張國榮(哥哥)與黎小田對話,哥哥指以前經常睇小田哥粵語片作品,指黎小田是自己學習對像,黎小田就讚哥哥是發奮圖強的人,哥哥聞言插嘴說:「最失敗識到你。」黎小田還表示與家燕姐拍節目,當年哥哥都肯幫手客串伴舞。

娛聞樂陪你走遍全球追星,即Like「娛果」FB 專頁!
BannerBanner