【世紀之戰2】黃秋生港台《視點31》撼何君堯:佢好戲過我

更新時間 (HKT): 2020.01.10 17:45

杜汶澤上年11月應港台邀請,與陳百祥一起在節目《視點31》中進行「世紀辯論」,結果顯示黃藍除了是政見,亦證明智商上都有分別,而該次「世紀辯論」創下香港facebook live紀錄,最高峰有27.4萬人觀看。

港台原來已經安排另一場「新世紀辯論」!今日黃秋生接受《蘋果》訪問,承認收到《視點31》邀出,將在下周二(14日)與7.21跟元朗白衣人握手的何君堯辯論,討論內容將會是「警暴」。秋生說︰「係呀,佢哋打(電話)畀我助手問有冇興趣上去,我話利君雅(主持)就有興趣啦!佢應承我係,唔係咪走囉!佢問我想搵邊個(辯論對手),我又冇特別想搵邊個嘅。佢哋畀咗啲名我,有啲係講經濟,但我又唔識(經濟)。想就想上去節目啫,老實講自己才疏學淺,上去就混吉,當我爭取曝光啦。」

至於今次對手是律師,秋生話覺得不是辯論,自己就會以兩個人同時接受訪問去看待整件事,不會當成鬥爭或者比賽。他補充︰「我連自己屋企人都說服唔到,點去說服人哋吖。題目會係『警暴』,叫做表達意見,呢個題目我都會講到一下嘢嘅。講到警暴一定會講到『元朗721』啦。」

秋生又說當日一定會問何君堯是否識功夫,因為上年11月何君堯在屯門遇襲時反應超快,秋生說︰「佢避刀嗰下,反應快過成龍,我好好奇,武功好高,因為反應快過常人。不過就唔會當場要求睇佢傷口,嗰個傷口係愛的一吻,點知同『隊』佢嗰個人乜嘢關係。」

秋生透露,他沒有特別準備,只會以平常心去傾吓偈,他說︰「第一,我口才唔好,第二,我才疏學淺,第三,我連屋企人都說服唔到,上去其實混吉。其實我上去係想見利君雅,我仰慕佢,唔係去見何君堯。」他話深信何君堯情緒智商(EQ)很高,不如外間以為對方很易躁動,秋生解釋︰「一般人以為脾氣大叫EQ低,其實唔係,佢(何君堯)係用緊情緒,去獲得想要嘅嘢,佢係控制緊情緒,所以呢啲人係EQ高,佢隨時好戲過我。唔會搵佢嚟幫我教戲啦,容乜易佢撈埋我個份,橫掂佢而家冇乜嘢做。」

何君堯對上一次跟立法會議員朱凱迪出席同一節目時,有拍枱走記錄,秋生表示並不擔心,他笑說︰「佢拍枱走我驚乜啫,佢拍我走就驚啫。何君堯好似講咗話我唔係議員,唔會咁對我。佢會好斯文,我相信佢都係斯文人。其實我都有啲緊張,要打吓座先,希望佢身為律師真係口才會好啲啦。」

黃秋生在反送中運動期間多次批評香港警察,曾呼籲日本人:「暫時唔好去香港住喇你哋,因為啲警察黐咗線。」早前監警會5名海外專家集體請辭,黃秋生都揶揄監警會:「冇特效嘅特效藥即係假藥。」

娛聞樂陪你走遍全球追星,即Like「娛果」FB 專頁!
BannerBanner