【分豬肉】馬國明提名12次終奪視帝 「最受歡迎女角色」楊千嬅李施嬅鬧雙胞

更新時間 (HKT): 2020.01.12 22:58

無綫《萬千星輝頒獎典禮2019》今晚假將軍澳電視城舉行,最矚目的4個大獎,包括最佳男主角、最佳女主角、最受歡迎電視男角色、最受歡迎電視女角色,有分豬肉之嫌。

今年的最佳男主角,《金宵大廈》陳山聰一直被睇高一線,但最後卻成為馬國明囊中物,似乎是因為馬國明去年受到情傷,被黃心穎傷透心的一種彌補。這次是馬國明第12次提名男主角獎項,之前11次全部落敗,今年他憑《白色強人》飾演醫生角色成為視帝,宣佈得獎一刻,他再次展現天然呆的面孔,似是不敢相信得獎,身邊好友即起哄衝向馬國明身邊擁抱祝賀,傳過緋聞的契妹唐詩詠都戥馬國明開心,之後《鐵馬》兄弟林子善和黃家樂即拉着馬國明領獎,林子善戥兄弟開心說 :「呢個獎好多年前佢就要攞。」

接住到馬國明開腔:「今年好多嘢嚇親,今朝出門口時阿媽仲同我講中咗就發達,我話中咗都要做,阿媽話今晚8千幾萬六合彩。」並稱今年望到對手名已打定輸數,沒想過會得獎,他說:「都係有運,多謝台前幕後人員,個獎唔係我一個攞。」而最受歡迎電視男角色則由周柏豪奪得,他於2017年簽了星夢娛樂,現為TVB New Media旗下藝人,可說是無綫半個親生仔。

至於最受歡迎電視女角色則鬧雙胞,頒獎嘉賓馬德鐘、王浩信先宣佈李施嬅得獎,她興奮地說:「呢個獎,喺呢個台攞獎好難,入行咁耐第一次攞個人獎,今年對手有兩位影后級人馬,令我心跳加速、流晒汗。去年4月3日完約後,冇諗過企喺呢度攞獎,真係一個奇蹟....原來真係會個腦一片空白。」她感激《金宵大廈》每一位演員,她續說:「03年郭晉安攞視帝,佢話等咗18年,當年話希望唔好等咁耐,最後願望成真,我都係等咗16、7年就攞到,只要肯付出努力、堅持,俾人彈去增值自己,被踩低自己企起身,熱愛工作,抱住感恩嘅心,都可以捱出一個成績。嚟緊我會去加拿大拍戲,我會用一萬個努力,唔會令大家失望。」而楊千嬅亦獲宣佈得同一個獎項,但由於頒獎給千嬅之前,司儀與兩位頒獎嘉賓都沒有提及是雙人得獎,故頒獎非常突然。

影后級的惠英紅,得最佳女主角似乎亦是意料中事,她上台領獎時一派淡定,說:「原來真係緊張過金像獎,(個獎)仲重手啲添。」至於最佳劇集,則由《白色強人》奪得。

娛聞樂陪你走遍全球追星,即Like「娛果」FB 專頁!
BannerBanner