【黃何大戰難產】秋生切親手及外父離世未能到港台 何君堯單拖受訪

更新時間 (HKT): 2020.01.14 21:54

【新增內容及圖片】

今晚8時,黃秋生和何君堯接受港台《視點31》訪問,兩人在節目上「論良知.談正義」,主持是利君雅,這場世戰大戰全城矚目。然而,今晚黃何大戰卻難產!

何君堯於7時40分到,但近8時秋生都未見人,《蘋果》致電聯絡秋生,他在電話表示:「我冇去呀,第一,外父入醫院,我煮嘢食切傷手,要去縫針,啱啱去到洗傷口,外父又話危急,我要趕去第二間醫院,而家外父走咗,我等緊縫針,要縫3針,切到好杰,手指公傷咗,手指公代表長輩,切傷時個心都離一離。」

對於不能到港台出席黃何大戰,大家好失望,秋生說:「由得佢失望,我絕望添呀!可能上天安排叫我唔好去。」

港台《視點31》的監製尤翠茵,在節目開始前現身,向在場的傳媒表示黃秋生未能到場的原因,她說︰「我係《視點31》節目嘅監製尤翠茵,非常之唔好意思,黃秋生突然同我哋講有突然事件嚟唔到,我哋會決定繼續同何君堯做訪問,我哋同事亦去咗搵黃秋生,我哋盡量希望喺現場同佢做到訪問,希望大家繼續留意我哋節目,唔該晒咁多位。」

黃秋生今晚趕到律敦治醫院欲見外父最後一面,可惜最後因塞車而未能成事。《蘋果》記者今晚抵達律敦治醫院時,見秋生左手手指公包住紗布,記者問他傷勢是否嚴重時,他舉起右手說:「5針,真係橋㗎啫!(五大訴求,缺一不可)」他講述事發經過:「將把刀接落個刀套,個刀套好窄呀,然後一跣手,喺個尾度剷....唉!我個心已經『浪一浪』,因為已經收到電話話外父入醫院,我又好迷信,手指公代表長輩,一切完之後好多血,我心諗:『大鑊。』跟住我去醫院,洗緊傷口,就接到工人電話話佢危險,即刻仆過嚟另一邊,咁佢已經走咗喇!我必需要講,啲警察非常之好禮貌,咁梗係有人講:『梗係啦見到你。』未必㗎,我想講嘅就係,唔係全香港警察都係傻㗎,有好人嘅,所以更加需要查清楚究竟邊啲係傻、邊啲係好人,要分返開。」

問之後會否再跟何君堯續賽時,秋生表示:「呢啲唔係我約,係港台約,如果人哋有興趣再約,又或者佢又唔得閒呢,點知啫呢啲嘢,我又要幫我外父辦後事....唉,濕滯。」秋生一再表示自己縫了五針,正好「缺一不可」,他指太太不在香港,獲悉外父離世後傷心落淚。

記者問秋生會否怕被藍絲以為今晚是怕了他們所以缺席時,秋生說:「點講呢?話我驚你驚到切自己手指?點形容呢?斬腳指避沙蟲,話我斬手指避沙蟲,斬手指避臘腸,人哋洋腸,佢就臘腸,(望住自己切傷的手指公)都幾似吖,臘腸仔,唉,講乜都好啦,我已經係倒瀉屎咁樣。」

採訪、攝影:梁繼光、羅德光

娛聞樂陪你走遍全球追星,即Like「娛果」FB 專頁!
BannerBanner