【密謀大計】錢嘉樂拍蝦頭做舞台劇有火花 袁偉豪尾場爆肚冇仇報

更新時間 (HKT): 2020.01.20 11:13

由錢嘉樂、黃智雯、袁偉豪及楊詩敏(蝦頭)主演、潘嘉德執導的舞台劇《今晚打老虎》,昨晚在灣仔演藝學院圓滿結束。梁漢文、方力申、鄭敬基、胡鴻鈞、高海寧、胡定欣及王君馨等到場支持,湯盈盈帶同兩個囡囡捧老公錢嘉樂場。

胡定欣早前到尼泊爾探訪,因此未能在首場前來:「好彩趕得切返嚟睇尾場,我同潘嘉德識咗好耐,又拍過佢啲劇,而且我都有份拍電視劇《王老虎搶親》,係一份情意結。」提到她到訪尼泊爾五日,是首次探訪貧窮地方,令她的價值觀有所改變:「真係要親身去、親眼睇到當地啲女仔喺生活上遇到嘅問題,先知有幾需要幫助佢哋。」胡定欣又與胡說八道的好姊妹分享體驗,希望將來可以一起去探訪。她又表示原本已助養一位小朋友,經過這次尼泊爾之行,希望可以再助養當地的小女孩。

梁漢文與方力申亦是座上客,曾與潘嘉德合作的梁漢文,特意前來捧場:「佢係第一個搵我做男主角㗎,當年拍《廟街.媽.兄弟》。」小方自爆原定有兩張門票,但朋友卻甩底,更自嘲「孤伶伶」,他說:「大家都知我『大壽』(40歲)啦,原本就唔諗住搞,孤伶伶慶咩祝吖。不過啲兄弟話每人帶個單身女仔嚟開party,我都有成十幾個兄弟㗎,佢哋個個結晒婚,不過就興奮過我囉。」小方又表示揀女友最緊要脾氣好,幾靚但脾氣臭亦冇用,身旁的梁漢文即笑說:「我鍾意脾氣臭喎,不過我老婆就唔係,佢脾氣好好。」

謝幕時,潘嘉德在台上透露錢嘉樂及黃智雯綵排時受傷,蝦頭致辭時亦感動嗚咽。黃智雯受訪時透露,原本袁偉豪將她拋起再接的動作,但因為右腰受傷需要改動,現時已無大礙,完成演出後可以好好休養。她說:「今晚最後一場,我哋講明要爆肚,因為冇仇報,阿Ben(袁偉豪)好勁即席jam咗首洋曲。」

袁偉豪自爆兩人的蝦碌事件:「我哋跳舞嗰陣,兩個頭套黐住咗,好彩冇扯甩。」黃智雯認為舞台劇最考執生,幸好有驚無險。她表示與多位前輩合作,學習到不少,希望原班人馬巡迴演出。問他們會否擔心無綫不放人?袁偉豪認為好的作品,得到觀眾支持,大家應該配合。他表示並未因舞台劇冷落女友張寶兒,袁偉豪說:「佢成日都喺度,喺後台幫吓我,有時啲朋友嚟睇,又幫我招呼朋友。」

蝦頭於劇中與錢嘉樂飾演情侶,大讚與對方合作有火花及默契:「我哋密謀緊將來一齊做啲爆嘢,睇吓電視劇、電影會唔會再有機會合作,唔好嘥咗啲默契。」錢嘉樂亦禮尚往來,指蝦頭為演出付出百份百:「以前我淨係覺得呢個女仔好笑,唔知佢原來咁勁。喺後台見到佢真係喘晒氣,每一下都唔可以放鬆,呢樣嘢大家好似。」他亦感謝潘嘉德的邀請:「我都做咗幕後,成日諗住啲爆炸呀、跳樓,個人成日都唔開心,今次做返演員,又搵返演員嘅感受。我哋好大膽做六場,原本係十場,初初都有擔心。頭三場做完有口碑,之後賣飛好好,呢個幾鼓勵性,香港人都需要啲甜頭,可以唔使諗煩嘢。」

提到他因綵排受傷,要照磁力共震,錢嘉樂說:「我踩『人梯』嗰part,綵排嗰陣失平衡,成個彭丹拱橋咁。之後好痛好痛,我怕拉傷韌帶,最後原來扭到個半月板啫。」為了演出,他做運動及辟穀,成功勁減廿八磅:「之前190幾磅,德哥話王老虎唔使減,但係我唔係肥,係腫,所以都要減吓啦,用咗四、五個月時間。」

娛聞樂陪你走遍全球追星,即Like「娛果」FB 專頁!
BannerBanner