【評論學會大獎】劉俊謙初登大銀幕即捧最佳男主角 太保首奪男演員獎

更新時間 (HKT): 2020.01.20 20:07

第26屆香港電影評論學會大獎今日公佈賽果,劉俊謙和太保分別憑《幻愛》及《叔‧叔》同奪最佳男演員,亦是首次出現雙影帝,大會指今屆經歷了長達7小時的激烈討論及3輪投票才選出5個獎項及6部推薦電影。

首次拍電影的劉俊謙成功獲選為最佳男演員,他坦言這個「突如其來」的消息,令他有點不知所措:「係開心嘅,但都會有一種突如其來嘅感覺,真係會懷疑嘅,因為我都係幾容易懷疑自己嘅,對自己要求好高,即係會覺得『我係咪真係咁好呢?』同時亦都好多電影評論學會嘅評審。」

提到同片的蔡思韵獲頒最佳女演員,劉俊謙表示自己今天因為一直忙於開工,未有時間去想太多,但相信會相約拍檔一起慶祝。

至於今次影帝鬧雙胞,劉俊謙坦言未有時間欣賞太保演的《叔‧叔》,他說:「我未睇,因為佢近排都係播緊優先場,我想之後再睇。」他指太保是前輩,一定會尊重對方。

在電影界有這麼好的成績,問到劉俊謙會否多拍電影,他指要視乎機緣而定:「因為自己其實都冇限制嘅,劇場、電視、電影都會做嘅,但係好多時我嘅主要考慮因素係我有冇興趣,如果有興趣嘅題材就會做㗎喇。」

劉俊謙雖是大銀幕初哥,但他早在2017年以《天邊外》奪得第九屆香港小劇場獎最佳男主角,日前又在關注香港電視製作的網上專頁《方以文 睇電視喇喂》舉辦的「觀眾在民間電視大獎」中,憑《教束》獲選為民選最佳男主角,今次再加上電影評論學會最佳男演員,可謂「三料」演員,劉俊謙謙虛地表示:「都唔知點形容,有啲受寵若驚,因為都好似冇試過得到咁大嘅肯定嘅,so far自己嘅演藝生涯裏面好多時都係經歷挫敗比較多,突然之間得到咁多肯定,其實係開心之餘,有啲唔知點應接先好。」問到他有無信心在即將舉行的香港電影金像獎中獲提名,劉俊謙表示:「冇呀,我好怕諗得太多,我覺得好多時完成咗部電影,我嘅使命就完咗,至於攞唔攞獎嗰啲嘢真係平常心。」

另一方面,對於憑《叔‧叔》在電影評論學會得到最佳男演員,太保回覆《蘋果》時稱:「梗係要多謝評論學會對我嘅肯定同鼓勵,尤其咁多專業人士,自己得到第一個男演員獎,非常感謝佢哋。」

娛聞樂陪你走遍全球追星,即Like「娛果」FB 專頁!
BannerBanner