【專訪】抗癌歌手李明蔚腫瘤擴散全身 從未放棄:一路都想康復

更新時間 (HKT): 2020.01.20 09:50

李明蔚(Sarena)曾經是一位歌手,有隊組合叫「小龍鳳」,兩年前推出過單曲碟《交換愛情》。「因為我喺2012年患上癌症,到現在7年都未好番,唔相信患病係事實,覺得係咪假㗎?」22歲被確診患上罕見癌症——鼻咽腺樣囊性癌,到現在已經醫了7、8年,因為這個病,Sarena被迫放棄最愛的歌唱事業。

多年來病情反覆,身體各處如肺部、肝臟、骨頭等出現不同大小腫瘤,兩年前因為流鼻血嚴重,搶救時醫護人員為她用喉管吸血,怎料情況更糟,最後要在喉嚨開一個造口幫助呼吸,導致聲帶受損。Sarena現在每講一粒字都很吃力,但她仍然沒有想過放棄治療:「我小學時已經很喜歡唱歌,會模仿歌手唱歌……一路都冇想過放棄,因為一路都想康復。」Sarena是家中獨女,自幼萬千寵愛,由於樣子甜美,求學時已經做兼職模特兒,訪問當日一直在她身旁的爸爸笑說:「我唔係好支持㗎咋,當時佢唔畀我知,後來見佢幫本雜誌拍廣告,又唔知點解去咗唱歌,或者受我薰陶啦,我曾經開過琴行,佢都識少少彈琴同結他,但唔擅長。」

李爸爸為方便照顧囡囡,決定由太太主外,自己主內,全天候陪實Sarena。現在父女關係更加親密,李爸爸更成為女兒的「代言人」:「一定更關心,每日對佢不離不棄,冇辦法,個女係自己嘅。佢細個時好少同佢傾偈,有距離,因為我要返工,佢去讀書,以前好少理佢,成日都話佢自己搞掂就好,點知突然有呢個病,冇辦法。」李爸爸知道女兒還有很多事想做,望一望Sarena,說:「有呢個病,爸爸唔畀你做。」Sarena說:「其實我最想可以再唱歌或拍戲,好想做呢啲,但係,好辛苦,都係做唔到。」

20歲組成兩男一女組合「小龍鳳」,唱了一首歌,當年李爸爸希望女兒可以繼續讀書,送她到加拿大繼續升學。怎料去了幾個月便開始流鼻血,李爸爸說:「初初以為乾燥,天氣影響,但佢鼻血流咗兩天都冇停,呢個就有問題喇,喺加拿大睇專科,檢查後發現有啲小腫瘤喺體內,於是返香港再做檢查,發現鼻咽內有腫瘤,但又唔係鼻咽癌,鼻咽癌反而有得醫,但佢係另一種病,冇癌指數,好奇怪,只驗出體內有好多腫瘤。」

鼻咽腺樣囊性癌又稱圓柱瘤或圓柱瘤型腺癌,腺樣囊性癌是淚腺惡性上皮性腫瘤中最常見,由於腫瘤會滲透血管、神經及骨組織,也是惡性度最高的。李明蔚22歲確診後,半年內進行38次電療和4次化療後,在她身上有數不清的副作用,如右耳聽覺餘下3成、牙骹肌肉萎縮、口腔潰爛,右邊臉癱瘓,導致會不自覺流口水,連右眼都因為不能閉上而紅腫發炎。李爸爸說:「其中一個腫瘤喺頸後嘅神經線上,壓住大動脈,好多專科醫生都話如果做手術,少許偏差都可能會流血不止,叫我哋諗清楚,最後決定唔做。」可以完全清除腫瘤嗎?他續說:「醫生話只能割除六成,仲有四成,即係仲會再生長,不如唔做手術,何必為此做大手術,雖然完全康復嘅機會好微。」明蔚早前接受眼皮上植入鉑金片手術,可惜效果不理想,李爸爸說:「都係合唔埋,成日流眼水,瞓覺要用紗布遮住。加上嘴張唔開,喉嚨又好窄,吞嘢食都有困難,我要將食物攪到好碎,如果濁親就好麻煩。」最近外國有一隻新標靶藥,檢驗後適合明蔚的血型,李爸爸喜孜孜說:「服食個多月,白血球數量下降,但藥效太強,但都適合佢,現在需要減藥。」

多年間,明蔚多得前輩馬浚偉出錢出力助她圓夢,出碟、出書,兼做舞台劇幕後助理,並發動組織幫她推廣其手作,明蔚直言無言感激。明蔚現時擁有唯一一首屬於她的歌《交換愛情》,而她在患病後,曾經有過兩段戀情,可惜都是由男方提出分手,她曾經傷心,但無怨無恨。那現在還想過追求愛情嗎?明蔚擰擰頭,李爸爸代說:「而家冇,好攰,佢身體唔好,點追求呢?除非真係有神蹟令佢康復。」

新的一年,明蔚親筆寫下願望:「新一年希望身體有好轉!病魔遠離!家人朋友身體健康!世界和平!」

娛聞樂陪你走遍全球追星,即Like「娛果」FB 專頁!
BannerBanner