【笑到停唔到】阿Bob高潮眼拖麥玲玲唱《好好戀愛》 網民:再睇隻眼生癌

更新時間 (HKT): 2020.01.20 14:21
(無綫電視截圖)
(社內相)

【新增回應】

各位讀者,聽歌前要做足心理準備!

由林盛斌(Bob)和麥玲玲拖手呈獻的《好好戀愛》,昨晚在大台《流行經典50年》開唱,阿Bob的歌劇式唱腔,玲玲師傅的讀字式唱法,兩人拖手合唱分手歌,壓軸仲要上演一幕阿Bob手按玲玲師傅胸口,抬高頭擺出一副疑似高潮樣,玲玲師傅露出喜悅的笑容,震撼觀眾。

兩人合唱的《好好戀愛》被網民瘋狂洗版,阿Bob在社交網開post求饒:「得㗎嘞,夠嘞,我知呀,唔使再WhatsApp同PM我,對唔住囉......」圈中人都紛紛留言,阿Bob逐一回覆,蕭定一取笑:「真愛」,Bob:「開套戲畀我哋啦」;江若琳:「我覺得娛樂性好高」、張建聲:「原本阿葉導叫我上,我真係唔夠薑,好在有你頂住,不過你越認真真係越好笑」。

有網民話好想知方力申和鄧麗欣有甚麽回應?Bob表示:「Stephy表示驚訝」有網民就讚他唱得好,阿Bob反問:「唔係啩」;而大部份網民都留言取笑:「五音不全嘉年華」、「唱到死老竇咁款」、「我笑到停唔到囉」、「冇歌手咩」、「再睇隻眼生癌」、「望住佢哋我嘅心情的確係……完了吧,如無意外。」、「我究竟睇咗啲咩」。

對於被網民洗版,玲玲師傅接受《蘋果》電話訪問表示:「我哋好認真唱呀,我已經特登畀咗錢Christine老師教咗兩堂6000蚊啦,我已經好努力啦。」被網民彈五音不全和睇到眼生癌,玲玲師傅大方說:「係咩,我哋走音咩,哈哈哈,咁嚴重呀,包涵吓,忍受吓,始終我哋唔係歌星,佢又低音,我又高音,係難搞嘅,純粹係為咗爆炸性被大家記得,我仍然認為係2020年最佳組合,可以去走埠登台。」至於點解被阿Bob按心口?她說:「邊度係心口,頸對落嚟,係佢設計劇情,佢話懶冧,本來頭碰頭,但中間唱到亂晒籠已經冇咗呢part,唔係啲人更加鬧。」

娛聞樂陪你走遍全球追星,即Like「娛果」FB 專頁!
BannerBanner