【洪金寶改花名】華戈題字見證港片黃金時代 入行感受戲行有情

更新時間 (HKT): 2020.02.01 06:01

就算大家未聽過華戈的名字,都一定見過他手字,現年70多歲的華戈,自幼受爸爸影響,喜歡寫書法,讀書不算多,就是寫得一手好字。行家一出手便知有沒有,賞識他的有王家衛,拍《2046》時,去澳門包起整條古裝街的招牌、字樣。華戈輕描談寫一句:「王家衛叫咪去囉!」但心儀的導演是杜琪峯︰「因為佢好信任我,我寫嘅字佢一定收貨。」

據華戈講「字,並唔係就咁寫」,每套戲的戲名都有出處,他說︰「《逃學威龍》係講學生、係調皮嘅,調皮中好靈活,《濟公》要有種高低腳,配合番濟公嗰種不羈;《古惑仔:戰無不勝》一定要點呢?就係大家好後生⋯⋯」原來每次製片找華戈求字,首要是讓華戈知道套電影的起承轉合,他才可以「因情題字」,為電影選用「合適」的字體及寫法,行行出狀元,不同狀元包羅不同學問。作為影壇御用書法家華戈,原名馮兆華,筆名由來據他所講,要追溯至港片的黃金時代,在片場由「大哥大」洪金寶所賜,他回想時說︰「好似係有次大家食緊飯盒,洪金寶話叫我『華仔』唔好聽,叫『華戈』啦,用『干戈』個『戈』勁啲。」結果一用用了幾十年,直到今日。

講到工作流程,華戈用2011年古天樂、劉亦菲版的《倩女幽魂》做佛例子︰「我要知道劇情,先可以寫到嗰種感覺。我聽完故仔之後,覺得《倩女幽魂》兩個主角,有種隱晦、藕斷絲連、好幽怨嘅關係,所以要寫出呢種風格,用隸書表達最好,最後用隸書加啲行書元素,再加日本感覺嘅書法效果,咁樣寫出嚟就好睇,係嗎?你睇完覺得係,就會心思思想買飛睇,票房自然會高。」至於收費,華戈笑言未至於「一字值千金」,但會因為製作費來決定,他說︰「有時好難講,你知我唔係賣行貨,譬如你係大製作,我會收貴一啲。假如你嚟到話『華戈,我係新出道,可唔可以幫幫忙,平啲可唔可以呀?』咁就可以,冇問題。隨便一封利是,總之你認為預算係幾多,一封利是,紅色就得嘞。」

華戈為圈中人題字多年,見盡不少世態,他表示試過有位藝人準備開餐廳,要求寫招牌字樣,寫好後傳了給對方,該名藝人自然非常滿意,華戈說︰「咁我叫佢得閒嚟攞啦。點知一個月唔見佢、第二個月又唔見......我唔可能成世幫你保管住,你冇錢唔緊要,你攞走幅字,我會比較開心,最後佢連電話號碼都改咗,微信又唔覆,你係咪覺得戲子無情呀?始終我用我嘅心血,用我最好嘅才能嚟幫你,係嗎?」又試過有個導演叫他幫套戲名題字,他說:「睇完之後話『好呀!好呀!』點知後來話套戲開唔成,幕後老闆話冇錢。咁你就唔好叫我寫,又話非常滿意,所以後來嗰啲都係畀咗錢再寫。」當然亦有通人情世故,《一念無明》的導演黃進就是很好的例子,華戈說︰「佢有日打畀我問:『華戈你喺邊,我係黃進。我專程嚟探你,多謝你幫我套戲題字。』有時就係將心比心。」

娛聞樂陪你走遍全球追星,即Like「娛果」FB 專頁!
BannerBanner