【武漢肺炎】陶傑黎芷珊曾與確診患者共乘郵輪:我哋會自我隔離

更新時間 (HKT): 2020.02.02 11:17

根據啟德郵輪碼頭船期,上月25日只有鑽石公主號郵輪抵港,碰巧地黎芷珊、陶傑、張寶華等一行8人同樣乘坐鑽石公主號旅遊,《蘋果》聯絡黎芷珊,她說:「我身體冇事嘅,其實我25號返咗香港之後我都冇出過街,同埋我自己住,所以就算有事都應該冇傳染到其他人,我而家冇任何病徵,冇乜特別唔舒服。」

黎芷珊表示:「我一直都諗住自我隔離㗎喇,因為我外遊完返嚟,我自己都擔心,一早就已經喺屋企自我隔離緊,噚晚知道之後當然有更多少少嘅擔心,不過可以放心我冇病徵。可以放心,我唔會出街㗎喇,嚟緊兩個星期我會繼續自我隔離。」至於同行的其他人,黎芷珊亦回覆道:「佢哋都冇事呀,我哋有個group大家噚晚都討論緊,但係大家都冇病徵,總之我哋呢8個人都會自我隔離,直至到下下星期。」

而陶傑則以短訊回覆《蘋果》,承認曾與確診患者同船:「是,不過不同層,冇不適。」有否自我隔離?他說:「正式查找指引。要隔離的應該是近距離有接觸者。不過一架船有三千人。如果要隔離的話,那個人住的葵青成個屋邨的居民恐怕都要。不必過度恐慌。」

張寶華表示凌晨三點幾知道消息後大嚇一驚,「一齊玩嘅朋友通知我,都嚇一嚇!我諗應該冇事啩,佢哋喺10樓,我哋喺11樓,同埋船分好多艙,佢哋喺船頭,我哋喺船尾,都有一段距離。」大批旅客同船幾日,餐廳、大堂等公眾地方可能會有交集,張寶華表示:「餐廳好好,旁邊有洗手盆,佢哋派咗兩個員工企喺餐廳旁邊叫人洗手、洗足20秒先食飯,我有次掛住玩手機直行,佢都有叫停我洗手。我冇印象有80幾歲嘅香港人,so far大部份係日本人多,講廣東話嘅好少。」她表示自己初一在香港落船,之後船再去了台灣、越南等地,「最怕係之後有人住番患者嗰間房。」張寶華謂不太擔心染上武漢肺炎,但安全計,會自我隔離多幾日,「初一返嚟之後都冇乜出街,本來初七開工都冇去,會留喺屋企,自我隔離多幾日。」

另外,陶傑亦於FB撰文交代情況,「至今離登船13日,離登岸香港8日,我和船上其他認識的朋友沒有一個有症狀或不適。我不擔心,但盡量少出外。多謝各位關心。雖然已查明那位高齡病者及其家人在船上五日所住艙房是另一層,不必過度恐慌,但尚不肯封關的香港又是何等脆弱。這艘郵輪之上大多數是日本乘客,船快將回抵東京,希望船上人人平安。」

-----------------------------

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner