【狗仔出更】麥玲玲走兩間超市買餸 驚嘆菜心盛惠85蚊

更新時間 (HKT): 2020.02.07 20:04

近日肺炎肆虐,更引起全城「盲搶炎」,先後搶口罩、消毒用品,甚至米和廁紙,連日來市民都逼爆超級市場和藥房。今日是農曆十四,仍是新正頭,《蘋果》在銅鑼灣遇到堪輿學家麥玲玲,她正前往一間超級市場買餸。

下午接近6點,麥玲玲一身紅噹噹與一名外籍女傭,齊齊戴住口罩,在超級市場買餸。見她專攻蔬菜及凍肉櫃,她還細心教女傭選購雞蛋及蔬菜,見她行了15分鐘左右,便去排隊付款。由於現場有不少市民購物,麥玲玲排了約十多分鐘才輪到她付款,離開超市時,見她與女傭手都拿住數袋物品。

麥玲玲離開超級市場後接受訪問,她說今日買餸都幾困難︰「四圍啲嘢都冇得買,想要嘅嘢好多時都斷咗貨,其實都係第二間超市,本來喺中環先嘅。」好多人搶水、搶米、搶廁紙,問她會否買入物資?她說︰「已經買咗,(口罩呢?)有朋友幫手,我又未至於好驚,總之有就得㗎,所以好早期朋友問我要唔要,我都唔會要好多,留番啲畀人買,但到而家又有啲貨源緊張,所以都幾論盡。」

至於近日蔬菜價格升了,問她有否覺得菜價貴了好多?她說︰「貴喎!菜心成85蚊,我好耐冇出嚟認真買餸,好多時姐姐自己買,近排我驚司機車唔到佢,又怕佢搭交通工具唔安全,我同佢出嚟買,然後我先發覺真係唔平。如果落街市嘅量係多,但係啲嘢係貴。」

對於近日香港肺炎疫情,問麥玲玲對這一役有何看法?她說︰「我覺得唔使好驚,因為七赤破軍星入咗中宮,破壞咗先建設,譬如啲嘢推冧咗重頭嚟過,立春之後一、兩個星期都會有啲轉捩點,希望好啲大家唔使咁精神緊張,四圍掛住買嘢,儲備嘅嘢唔需要太多,足夠就算。」她希望大家放鬆心情,她笑謂︰「噚日拍緊節目,聽到話冇廁紙,要搶廁紙呀,叫司機去最近超市搵,都會有呢種感覺,我自己覺得其他都係正正常常。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner