【凡事有代價】杜汶澤用資本主義開解恭碩良:嗌口號攞口罩幾X抵deal

更新時間 (HKT): 2020.02.08 11:02

前日剛宣佈分手的恭碩良不滿「Tommy仔」阮民安派發口罩時要求長者要講出「光復香港時代革命」、「黑警死全家」及「林鄭月娥正仆街」其中一句,大罵:「你嚮呢啲咁嘅時勢玩X啲老人家,你好X嘢!」網民反應兩極,有網民鬧爆恭碩良是「廢佬」,亦有網民指恭碩良其實是黃絲,曾在IG Story斥香港領導人是白痴。

今早一向支持抗爭的杜汶澤於FB撰文,表示自己嘗試解釋一下,希望恭碩良不必勞氣:「資本主義社會,想得到任何物資都需要付出代價。地球資源有限人類需求無限,有資源響手就自然可以要求需要資源嘅人付出代價,講到呢度明唔明先?好簡單係咪?所以到今日有藥房炒到1780一盒日本仔口罩我都冇出過聲,我個心好憎藥房佬但係我尊重資本主義精神,都忍咗好多日。」阿澤續說:「咁Tommy仔自己買咗啲口罩,愛嚟做乜係佢嘅事,甚至乎要嚟換蝦條都得,如果係咁可能會核突咗啲,但係都只係交易嚟。」

至於Tommy仔的行為除了符合資本主義之外,是否合乎道德?阿澤沒有明確表示:「我有理由相信,Tommy仔提出呢個嗌口號嘅原因有兩個,一就係想派比同路人,咁點分同唔同路?佢認為嗌句口號就分到,咁囉。二佢可能有些少反叛,想睇下啲同佢政見唔同嘅人,為咗個口罩而卑躬屈膝,想爽下,作為一個資源持有者,我睇唔到有咩問題,都係嗰句,你可以唔嗌㗎嘛。」

阿澤指出:「其實每個人嘅道德標準都好唔同,所以每個地方都有自己嘅法律同埋經濟制度,希望確保到所有人都得到相對嘅公平。如果你享受資本主義帶畀你嘅利益,例如唱歌有錢收,咁就好應該尊重資本主義嘅精神。」

最後阿澤表示:「以我性格,我唔會叫人嗌口號之後畀啲嘢佢,更加唔會為咗得到某啲物資而嗌口號!性格嚟啫,冇乜高低或對錯之分嘅!不過,從經濟嘅角度來講,我認為嗌句口號可以攞個口罩的確係幾X抵deal!」於文章尾段,阿澤更向恭碩良喊道:「Jun ! Do you understand now?」而林日曦於下方抵死留言:「一開始就講英文佢會易明好多。」

-----------------------------

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner