【鶼鰈情深】韓馬利承諾為杜燕歌改變自己:做個合你心意嘅太太

更新時間 (HKT): 2020.02.08 12:55

韓馬利(Mary姐)與杜燕歌結婚30年,夫婦鶼鰈情深,日前他們接受好友車淑梅的訪問,分享當年從拍拖到結婚的經歷,亦提到早前Mary姐因腦膜炎在醫院昏迷了一周,幸好最後死裏逃生,她感激老公對她無微不至的照料和安全感。

去年8月,65歲的Mary姐因腦膜炎在醫院昏迷了一周,當時情況相當危險,一隻腳幾乎踏了入鬼門關,在她住院期間,杜燕歌每天為她烹調不同的食物兼親自餵食,還表示太太不懂得照顧自己,所以他寧願自己生病,令Mary姐十分感動。Mary姐坦言經歷過後,令她深深感受擁有健康才會擁有一切,更令她學懂了珍惜:「今次病好辛苦,但變成一個祝福,我明白一定有明天,但係明天不一定有我。我以前好驕傲、係工作狂,要別人認同先感滿足,因而冷落咗丈夫,忽略咗佢嘅感受。」Mary姐更在節目向丈夫表白:「我要向你(杜燕歌)講多謝,多謝你忍受我,同埋對我付出嘅一切,我會改變自己,希望做個合你心意嘅太太。」

後來他們亦提到當年相識經過,原來他倆的情緣竟由飲熱鮮奶而起,Mary姐說:「嗰陣佢(杜燕歌)喺澳洲返香港度假,參加咗藝人之家嘅活動,嗰次我哋大家喺酒店咖啡室飲咖啡,佢竟然叫熱鮮奶,仲一連飲三杯,我心諗呢個牛奶仔好奇怪,覺得佢唔會口花花,好有內涵,從來唔煙唔酒,好乖好靜,於是開始對佢有興趣,我哋嗰陣開始寫信同寄錄音帶畀大家,佢又會喺聲帶裡唱歌,唱得好似費玉清,我當然迷上咗佢。」

之後結婚的過程亦相當特別,杜燕歌笑說:「有一次佢突然打電話話要嚟澳洲玩,問我招唔招呼,我話:『好,冇問題!』佢話如果我嚟澳洲嫁畀你呢?我就話:『你夠膽嫁,我就夠膽娶!』嗰陣大家只係講笑,點知結果變成真!證明我哋心中都有對方。喺澳洲,人人叫我杜老闆,但返到香港有人叫我韓先生,我心裡邊覺得難受,但是亦要放下男人尊嚴忍耐住,因為Mary喺澳洲我嘅餐館,係會落手落腳咁去幫我招呼人客,甚至幫我洗酒吧、洗廁所,一啲明星架子都冇,我感激萬分!只係老婆太工作狂喇!喺香港對我關注好少。」他還表示自己曾經送了一份別出心裁的愛情禮物:「記得結婚10周年,我寫咗一首詩送畀佢,而家掛喺牆上,佢可能冇留意到……我只係希望佢明白我,讀懂我,陪我遊山玩水睇瀑布、種盤栽……」聽到老公愛的宣言,Mary 姐亦含情脈脈的回應:「經歷咗呢場大病,老公畀我好大安全感,我希望佢以後都話我知有咩需要,要講出口,我一定會做,我一定要揭開你(杜燕歌)呢一本書……讀識佢!」

-----------------------------

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner