【娛圈長者】余慕蓮1個口罩用兩日 68歲吳孟達大馬避疫

更新時間 (HKT): 2020.02.12 00:30

武漢肺炎疫情擴散,香港已有49宗確診個案,但市面依然一罩難求,人心惶惶,尤其是不懂上網的長者,有的甚至要通宵排隊買口罩,昨日鄭敬基揭66歲盧宛茵缺口罩,依然要冒險返無綫開工,其實娛樂圈有很多默默耕耘的長者,需要圈中人關心送暖。

82歲的余慕蓮入行51年,現半退休的她是獨居長者,家裏只餘20多個口罩,一個口罩用兩日!余慕蓮接受《蘋果》電話訪問說:「我唔出街咪夠囉,而家仲有20幾個,未曾發生呢件事之前,我長期都有一盒喺度,因為我平時鍾意睇大戲聽歌,一定戴口罩,因為怕空氣濁,驚住會咳,嗰時係50蚊50個一盒。」

只餘20多個口罩,余慕蓮都很徬徨:「我用晒先算,你買到話畀我知!而家冇乜事咪少出街囉,買餸呢,一日買定兩日,口罩就一個用兩日,用完之後,摺埋入返信封度。」記者提醒她口罩不能摺完再用,余慕蓮無奈說:「係咩,哦,是但啦,我而家都唔鍾意出街,費事感染嗰啲嘢,留喺屋企最安全,買唔到咪唔好出街,驚得咁多咩,生死有命。」問有冇試過排隊買口罩?她說:「梗係唔會啦,戇居!有啲朋友話可以畀少少我,我用晒先啦,多謝佢哋。」

面對口罩戴一個少一個的日子,余慕蓮惟有留在家中:「睇吓電視、聽吓收音機,多啲休息囉,因為我已經半退休,少咗出去打牌,本來我係2月4日喺高山唱粵曲,而家都cut咗。我嗰啲唔係工作,係娛樂,我而家冇簽約,鍾意咪拍兩三日電影,唔使捱夜。」問到經濟有否問題?她說:「冇乜問題,自己有間屋,如果我有問題,我一早簽無綫啦,無綫叫過我幾次都唔簽,做乜要捱更抵夜啫,做咗60幾年仲唔夠咩。」

而患了漸凍人症的63歲前「TVB綠葉王」吳博君,因病情每況愈下無法工作,靠患有小兒麻痺症的太太照顧,兩夫婦除了要對抗病魔,還要為口罩憂愁,吳博君以短訊回覆《蘋果》:「多謝你關心,我大概有3盒左右存貨,每盒有50個,唔知夠唔夠用呀,我太太同埋工人姐姐每日都要出門。不過用完之後就唔知點啦,見步行步囉!」問到現時身體情況,他表示:「比之前略差,力量減少了,可能肌肉正在慢慢流失。」

至於去年戰勝癌魔的59歲黑妹李麗霞,身在馬來西亞避疫,她在電話說:「我喺馬拉,呢邊口罩都缺貨,而家身體唔係咁好,抵抗力差咗,唔想喺香港,香港真係好危險,你知我又鍾意出街,所以真係避一避。」曾患心臟急衰竭的68歲吳孟達,同樣身在大馬避疫,他以短訊回覆表示口罩夠用:「有的,夠用,謝謝您關心,我在馬來西亞,我們很好,謝謝您,跟大家一樣,少出門,暫時也沒有打算回港。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner