【爆喊完】麥明詩盼「別太鞭屍」陸浩明 Ben Sir:千錯萬錯源頭一定係隻臭X!

更新時間 (HKT): 2020.02.18 14:03
(facebook圖片/IG圖片)

陸浩明(6號)昨日現身,聲淚俱下為一句口誤:「香港係沙士病毒源頭」致歉,但網民似乎仍「未收貨」,餘怒未消繼續鬧。拍檔馮盈盈一早已在社交網稱「我們都責無旁貸,深深感到抱歉」。而歐陽偉豪(Ben Sir)和麥明詩今日也開腔為舊拍檔護航,Ben Sir直言:「出呢個post之前我都要諗過度過,雖然我唔出聲冇人話我啞,雖然我照出聲亦吹我唔脹,因為我係任性嘅。」

Ben Sir和6號合作過3輯《Ben Sir睇樓團》、《Ben Sir研究院》和talk show,他表示欣賞6號有錯早道歉的做法,他說:「我亦唔可以唔撐佢,因為我哋要拍bensir睇樓團第4輯。」Ben Sir覺得6號雖然錯,但有一個人更是罪魁禍首:「之前反送中期間,亦有KOL照樣瀨嘢,姑勿論表唔表態。藝人,KOL, 以至社會每個階層都搞到咁分化,千錯萬錯個源頭一定係隻臭X!(利申:我下次做節目強烈要求不要配字幕!)」雖然Ben Sir沒有詳解「臭X」是誰,但大家自然心中有數。

麥明詩是《後生仔傾吓偈》舊主持,6號出事,麥明詩亦有第一時間幫口:「以我對6號嘅認識,佢係曲掛...」但卻惹來網民圍剿,有網民認為沙士一事,為港人帶來悲痛,不能以一句「曲」去解釋。麥明詩今日再在IG撰長文,希望大家原諒6號,並為自己之前的失言認錯,希望大家可以將關注放回「真黑心、不道德、埋沒良知」的人身上。全文如下:

【別太鞭屍】

Ben sir話齋,唔講嘢冇人話我啞;我亦都知道我講嘢對我冇任何好處,但或許我現在比較少顧慮,正所謂「官到無求膽自大」#曲,所以忍唔住講多句:真係希望大家可以把槍口對番準啱嘅位置。

一月尾嘅時候,梁卓偉因為一句「戴口罩講唔到嘢」論多日備受關注,好多人卻忽略了佢之後出嚟宣佈,以模型分析預估已有4.4萬人感染。其實佢冇必要出來講一個同正式公佈確診數目差咁遠嘅數字(嗰時正式公布確診不夠1萬),佢之前嘅口罩論的確係誤導到大眾,但佢隨即道歉,且繼續出嚟分享一啲或許並非緊貼官方口吻嘅報告,我覺得起碼算係(比較)有承擔,係咪要chur住佢唔放呢。

陸浩係我合作咗幾年嘅前輩,說實話佢一直照顧後輩,有幾次我同fyy出大show出錯佢都幫我哋補鑊carry我哋;當然,講到良知嘅時候唔可以被私人感情左右;佢呢一次佢固然係大錯特錯,但佢緊接講錯嗰句之後,佢係話「係因為有個廣州人喺內地食…」然後yy話「係佛山」;資料都未必係啱,但係可見應該係一個口誤,佢當時應該係知道由內地傳落嚟。

當然,呢個口誤好嚴重、佢責無旁貸;而陸浩亦即刻出嚟道歉。大家可能對於佢同某些其他前輩嘅關係而有所意見,比較圓滑係佢做人處事嘅方式,但係佢點都係一個試過喺《後生仔》大嗌「唔好搞我後面」、一直專注香港市場、專注做廣東話節目嘅主持。

佢係錯,而我之前未睇清楚段片就評論咗都係錯,剪接組冇修正係錯,字幕組照配字幕係錯... 但希望大家關注咗呢件事之後,可以將關注放喺啲真係黑心、不道德、埋沒良知嘅人上面。謝謝

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner