【add名人時尚】鼠年新娘麥少瑜嫁潮人Kevin Poon 訂做《花樣年華》嫁衣

更新時間 (HKT): 2020.02.20 02:00

Angelababy師妹、24歲中英混血女模麥少瑜(Fiona McLeish ),雖然樣子似15歲,但今年做鼠年新娘,五月嫁給陳冠希生意拍擋、潮人Kevin Poon。樣子鬼鬼地,但操一口流利廣東話的Fiona,自認傳統女人,買新婚大屋先要睇風水,婚紗不用潮爆,但一定要穿龍鳳裙褂,「媽咪幫我搵咗王家衛電影《花樣年華》的旗袍師傅,幫我做衫結婚着。」

麥少瑜和拍拖兩年的潮人Kevin Poon結婚,揀了男友求婚地夏威夷,「初初我哋想搞個好細型嘅婚禮,但而家要預多少少人,香港就可能淨係簽紙。我個人好傳統,嗰啲斟茶儀式,一定要做足。」

鬼妹仔樣子的Fiona原來「白皮黃心」,非常中國化,喜歡講中文多過英文,平日寧願吃中餐、拜觀音、信風水,結婚新居未買到,都因為風水,「我哋搵咗一間屋,幾鍾意,但風水師傅睇咗,話唔好,所以冇買到。」婚禮現時仍未知會否受疫情影響,但大日子最令她擔心的婚紗已找到,放下心頭大石,「我鍾意公主裙嗰類cut,又鍾意Hailey Bieber背後有啲字,Vera Wang都有幾套係咁樣。最後喺中環有間Trinity Bridal,佢哋好好,花咗好多時間幫我搵。我喺夏威夷搞,要走來走去,所以搵到件小型A line,之後喺草地晚宴,會再換一條貼身啲嘅晚裝。媽咪仲幫我搵咗王家衛電影《花樣年華》嘅旗袍師傅,幫我做裙褂,咁真係好傳統。」至於未婚夫KP就會穿禮服,配潮人波鞋,Fiona說:「I really feel I am married,我都會煮飯,已經有人叫我潘太,KP都成日同人介紹『呢個我老婆』呀!」

25歲就決定結婚,Fiona指父母沒有反對,她覺得未婚夫比自己預期的另一半更好,「佢個性格同我性格有啲似,有啲唔似,拍拖初期要互相適應,我個personality係好safe,佢就會突然話『我哋聽日去上海』,好多突發事。」至於最愛另一半哪些特質?「好多!好尷尬㖭,我鍾意佢好勤力,同埋好錫我屋企人,我要求嘅嘢,佢永遠畀到我更加多。」加上KP會為Fiona爸爸舉行生日派對,求婚前先徵求未來外父同意,都令麥家放心將女兒嫁出去。

KP和陳冠希合作開潮牌、舉行名牌公關活動等,麥少瑜因為KP的關係,都出入時尚潮流圈,她甜絲絲地說:「其實我冇諗呢個係唔係fashion event,會見到乜人,去邊都咁開心,因為同佢一齊!」Fiona入行前做過marketing,在街上被星探發掘,無意中成為Angelababy師妹,由行婚紗騷的女模,變成被邀去巴黎睇Chanel騷,亦參演過電影《蝕日風暴》,自認是幸運女孩。她樣子甜美、個性爽朗,極愛做運動,「I'm so lucky,因為由細到大,我唔會諗我係super pretty,因為我個樣細個,又好似未發育咁,係very baby face,我由細到大都冇話好想做model,here we are now!」至於婚後,她謂會繼續模特兒工作,也想開公司,但更想做兩件事,「我好鍾意小朋友,我哋想快啲有BB,同埋想做多啲慈善,幫人係最開心嘅。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner