【河南連執兩店蝕百萬】吳啟明生意跌七成諗計變陣 業主收「減租call」即潛水

更新時間 (HKT): 2020.02.26 06:00

武漢肺炎擴散未受控制,教育局宣佈最早於4月20日復課,不少公司為保障員工讓他們home office,巿民避疫不敢外出,減少社交聚會,連鎖餐廳酒樓都捱不住貴租相繼執笠,吳啟明在上環的星級食肆「慢煮兩餐」也受疫情影響,生意大跌。一直密切留意疫情的吳啟明即調動餐廳的安排,眼見晚上沒客人幫襯,他索性全面暫停晚巿。

餐廳在2月開始只做午巿,吳啟明這天下午1時許返店巡視業務,店中有八成人客來吃午餐。為了讓食客食得安心,店中加強防疫措施,吳啟明表示每天開店前員工都會全店做清潔消毒,「自從開店以嚟,侍應送餐一直都戴手套,而家當然要佢戴埋口罩,廚房工作就要戴帽,以防有頭髮跌落嚟。」現場所見,侍應會貼心為坐下的客人遞上紙巾,以方便大家妥善存放好自己的口罩才用餐,各式套餐已大部份換上即棄餐具,吳啟明解釋:「我哋呢啲係環保紙製餐具,疫情前都轉用咗㗎喇,主要我唔想加重洗碗員工嘅工作量,午巿套餐有蒸飯,因為原盅上枱先原汁原味,我哋仍會保留一定瓷器餐具。」

全店坐滿可以容納約28位人客,訪問當日店中午巿生意尚算不錯,「你哋眼見午巿係坐滿八成人客,環顧返之前,我哋午巿係一條長龍排到街尾,全店坐滿客人,仲會做到三轉,相比而家得八成客,係咪少咗七成生意。疫情都唔係得我一個人受影響,大家好清楚而家任何行業,除超巿外,普遍都跌七成,全香港人都承受緊同一樣嘢,疫情一開始,農曆年假後,我哋cut咗唔做晚巿。晚巿冇人客,我繼續開都冇意思,員工全晚呆企4個鐘佢哋都悶,不如返去唞吓,又可以慳返燈油火蠟。」疫情一度現令巿面出現「盲搶炎」,吳啟明續說:「食材我哋一向有存量,不過大陸疫情嚴峻,我哋啲飯係用唔同地方三種米混合煮,其中東北米冇晒貨,我而家試緊另一款米代替,都少少頭痕㗎!」

不計老闆吳啟明,樓面廚房共有4名員工,員工縮短半天工作,薪金是否要減半?吳啟明坦言:「我一直唔想剝削員工薪金。」他寧願自己計掂條數,也要保着所有員工的飯碗,「我算好彩,中環夜晚生意向來唔係特別好,我最初開店都主打做午巿,一轉變兩轉,兩轉變排長龍,所以而家跌七成生意真係對我好大影響。」不過,良心僱主有好報,吳啟明對食物質素有要求,同時得到大機構向他每日訂餐給員工,「嗰間大機構以前一直幫襯快餐店訂餐,之後發現我哋嘅食物質素比快餐店高,嚟試餐後就轉向我哋訂餐,佢哋大量幫襯,全盛時期一日訂到最多500份餐,我就搞埋工場出餐,而家疫情,訂餐數量都少咗,最差都有50份。」

午巿接到外賣送餐訂單,算有穩定收入,但跟高峯期比較都明顯下跌了,若以每份餐60元計,每日定額有最少訂50份外賣餐計,月入約9萬,還有食店堂食客人,餐廳月租要8萬,未計店員薪金,收支都係「掹掹緊」,數口甚精的吳啟明即想到「變陣」,「午巿受影響,生意額cover唔到舖租,喺生意角度,我係要cut咗蝕錢部份,盡快斬纜,同時保留賺錢部份。」吳啟明看通午巿和外賣餐送服務有錢賺,他有想過把員工全調到工場開工,然後把食肆摺埋,就完全可以封上蝕本門。「最終呢步唔諗住,員工忽然冇嘢做,有啲啲人情味就唔想斬住。」吳啟明還聯絡業主嘗試商談減租共渡時艱,「呢幾日係咁搵業主都搵唔到,我留咗言,叫佢回覆都冇覆,通常業主搵租客唔覆啫,而家租客搵業主都冇覆。」吳啟明可想業主減租多少?「想佢減幾多,唔係我決定,大家近日都睇到報章雜誌報道,各大商場向租戶減一半租,又話二月份唔收租,我都係朝住呢啲方向,我都希望業主可以減我一半,其實去年6月開始社會運動,我過去半年都頂住咗,到去年底,近11月時,業主先話每月減我5000蚊,而家咁時勢,仲停留兩年半前租金,真係好唔公平,我主動搵佢傾,業主潛水,真係奇怪現象。」吳啟明會給自己和業主限期嗎?他續說:「睇埋3月先,除非業主企硬話千祈咪再減,佢而家咁只係減5000蚊係會逼我走。」

吳啟明的「慢煮兩餐」大半年間經歷逆權運動和武漢肺炎兩大難關,他最終心意都是不想把店摺埋,「唔關心血嘅事,反而關乎好多將來發展大計。」原來吳啟明早在疫情發前,已籌劃把餐廳食物衝出香港,他看到港人自逆權運動後有興趣移民台灣,「唔係話買間屋就可以移民台灣,要做啲生意,『慢煮兩餐』全店得十幾款菜式,我諗住copy啲菜色過去,每一味餸菜開一間專門店,比如我調製嘅豉油汁,店主可以用嚟整雞翼、鵝腸或乳鴨,咁另一間店就賣羊,都係大排檔細店,即使大家開隔籬都唔怕搶生意,本來一個月前都安排好一個40人團去台灣考察睇舖位,疫情爆發,台灣唔畀中港澳人入境,成個團都hold住,但我相信呢啲阻滯會過去,總會見晴天。」

吳啟明正想盡方法保留香港的食肆,但早年在內地的兩間「慢煮兩餐」卻難逃執笠厄運:「河南兩間慘喇,武漢肺炎大爆發,內地政府講明直情唔畀你開,香港呢間仲話我可以自己決定開晏晝做吓生意,既然係咁,長痛不如短痛,好彩大陸開店冇香港咁貴,兩間摺埋蝕咗一定有7位數字。」吳啟明可會待內地疫情散去,東山再起再搞飲食生意?他耍手擰頭:「唔會喇,因為自己基本上都唔上大陸,我嘅政治取向,我少返大陸。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner