【果燃上架】麥當勞叔叔被失蹤?從漢堡包自由揭示香港失去的自由

更新時間 (HKT): 2020.02.29 23:00

麥當勞,「姓麥名當勞,別號金拱門」——皆因一道金黃色又耀眼的弧線(唔係真係姓麥架!)。但我要強調,麥當勞全名其實係麥當勞公司(McDonald’s),真正譯法我哋或者應該叫佢做「麥當勞的」,有一個「’s」,作為尊重知識產權嘅香港人,不能遺漏這種小細節。而今集,我哋就係要講盡「麥當勞的」一切。(McDonald’s everything)

講到少少hardcore歷史始終係少不免嘅。喺1940年,美國嘅一對麥當勞兄弟(Richard and Maurice McDonald),創立咗麥當勞嘅前身,「麥當勞的BBQ餐廳」(McDonald’s Bar-B-Que)。講生意,就好有時悲有時啦,至少當年無「武肺」打擊,尚算中規中矩,但基於兩兄弟巧妙地運用咗速食文化,簡單快捷嘅營運模式兼夾高質量嘅產品,喺當地甚為引人注目。於是呢間「麥當勞的」,就吸引咗當時專賣奶昔機嘅sales雷文洛克(Ray Kroc)要求加盟。呢個雷文洛克,千祈唔好睇小佢係sales仔,佢絕對係現代版呂不韋,深諳「奇貨可居」之道。

呢一段往事,美國荷里活電影《大創業家(The Founder)》都曾經記載過,闡述麥當勞初期build up與出售予雷文洛克之後的發展。當年單deal係雷文洛克願意畀錢麥當勞兄弟,仲願意支付每年1%公司營業額作為權利金,但係麥氏兄弟非常念舊,就係唔肯賣出第一家麥當勞總店。Sales仔雷文洛克無計可施之下,亦「撤回」咗1%權利金。最後麥氏兩兄弟甚至失去麥當勞商標權。

扯得太遠喇,講番去正史先。當年係1961年,雷文洛克夥同拍擋向麥當勞兄弟提出全購——全面收購麥當勞公司。咁講真,麥當勞兄弟都唔係省油的燈,賣畀你?OK,270萬,美金,仲要係cash!

1961年,270萬美金,以現今港紙兌美金7.8算,折合約2,100萬港紙。而喺1967年嘅一則香港樓盤廣告顯示,一棟灣仔軒尼詩道大廈嘅單位都只係賣港紙20,000餘元,連本帶利月供200零蚊。咁,2,100萬港紙喺1960年代,你話發唔發財?anyway,我哋確實難以與今日水平作比較,但係聽落都知道大咬。呢單deal,就算唔使問財經版千頌C,我哋都知係「高手遇着高手」。

不過,雷文洛克就係有買貴無買錯,即刻課金。之後嘅歷史我哋都好清楚,因為「麥當勞的」由一個美國小鎮嘅快餐店,快過「武漢肺炎」迅速爆發成為全球知名嘅國際品牌,超過120個國家、超過36,000家分店。從愛情嘅角度嚟講,我哋唔能夠忘記ex嘅存在,因為麥當勞至今亦未忘舊姓。但我哋可以話前度賦予麥當勞「初戀的體會」,而雷文洛克,給予麥當勞「持續多年的高潮」。

呢份高潮,令麥當勞成為地球上最大的快餐連鎖店,冇之一,亦冇人夠膽加呢一個「之一」。佢哋嘅招牌菜「巨無霸」(Big Mac),更加稱霸漢堡包界榜首數十年,為饗客帶來久而不散的、舌尖上的高潮。可惜,萬物散聚,高潮有時,着返條褲都有時,住喺香港嘅你有冇發覺,近年、或者踏入千禧後,麥當勞嘅主打餐牌,巨無霸已經再唔係掛頭牌?又有冇發覺,每年偶爾如月經般出現嘅將軍漢堡、新近誕生嘅麥脆雞,統統都已排隊成為主角了?更甚者,70後80後嘅你,有冇發覺,當年我哋細個成日見到嘅麥當勞叔叔,都已經唔見咗,再也沒有人關顧他是否被失蹤了?

我哋會關顧所有失聯嘅手足,包括麥當勞叔叔。

「相傳」,麥當勞嘅幕後,深諳宣傳之道。當年佢哋嘅第一代吉祥物,係一隻稱之為「Speedee」嘅公仔,顧名思義就係sell「快」,試圖於20秒內製作並賣出一個漢堡包,因而得名。到咗1966年,美國流行馬戲文化,麥當勞因應馬戲團的潮流,另聘高人以小丑形象設計出麥當勞叔叔這個角色。呢位高人就必須要下兩筆介紹喇,佢係一位拉脫維亞人,名叫Michael Polakov,點解佢要將麥當勞叔叔設計成一個小丑?答案就係(唔係堅尼米拿),因為Michael Polakov本身嘅工作,就係一位小丑囉!

本來,麥當勞叔叔這個搞笑小丑,深植入我們70後80 後心坎,揮之不去,但2000年左右某些美國媒體,卻以麥當勞叔叔的小丑形象惡搞,更甚者把其小丑形象凶惡化,毁之甚深,崩壞了70後80後90後的整整數代小朋友。如是者,麥當勞幕後當機立斷,讓麥當勞叔叔這號人物,隨着97前後某些東西的淡出,也讓麥當勞叔叔於附近的時間點,消失於香港人的跟前。

「雙層牛肉巨無霸,醬汁洋蔥夾青瓜,芝士生菜加芝麻,人人食過笑哈哈。」當年呢個廣告,泛起過一股熱潮,小朋友興孜孜的走到麥當勞員工大姐姐的跟前(小編我當年嘅回憶),嘗試於三數秒內唸出這副急口令,就能換取一個巨無霸,這份「只要付出就能有收穫」的回憶,香港獨家。恕我說當年還未出世的90後千禧後不幸,當年這種尚存的公道、規矩,現今汝不能享有。有時候,我哋追求嘅,唔係一個巨無霸、一啖雪糕、一口薯條,我哋嚮往嘅,係當年呢一份純粹、公道。

萬千純粹,化成此集片段,供有心者憶記。小編再講多一個秘密畀你哋知吖,麥當勞,最初曾譯作麥當奴,後期才改作麥當勞。講真,當奴好定當勞好?當勞者,勞有所穫,尚稱天經地義;當奴者,_ _ _ _,諸位填充自便。

薯條只能回味,往事也只能回味。一切,還看你有種回味否。

-----------------------------

-----------------------------

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner