【城城丁母憂】郭富城強忍喪母之痛完成個唱 小美讚夠專業

更新時間 (HKT): 2020.03.04 21:05

郭富城今日在香港殯儀館為亡母設靈,他的經理人小美於晚上8時10分落樓接受傳媒訪問時透露:「城城狀態OK嘅,不過就有啲攰,因為一直要打點媽咪嘅後事,而家上面都係啲親友嘅拜祭,同埋頌經,今次嘅儀式以佛教為主。」小美稱城城因為想專心為亡母辦後事,所以不會接受傳媒採訪。

小美再透露,因為郭母生前喜歡簡約優雅,故靈堂以白色的鮮花佈置為主,她續說:「今次都算係笑喪,所以喺上面嘅形式都係帶住懷念嘅心情,對伯母嘅一種敬意,所以都好圓滿。」問到郭母有無遺願,小美表示:「我唔可以代伯母講,但以我認識嘅伯母,佢就好安慰㗎喇,因為已經見到城城成家立室,仲有孫抱,所以都好安慰。聽日伯母會以土葬形式下葬。(會否與郭父一起合葬?)我冇問呢樣嘢,據我所知就應該唔係嘅。」

提到郭母過身時,城城因為身在美國做巡迴演唱會,小美透露:「當時城城喺美國準備第2場嘅巡迴演唱會,開騷當日嘅朝早,收到媽咪過身嘅消息,收到消息唔夠24小時,城城就要開騷,我當時都有問佢需唔需要取消,但城城沉澱咗、接受咗媽咪嘅離開之後,決定繼續完成演唱會。」小美指,因為演唱會撞正新春期間舉行,城城如常演出,但就少了一些與觀眾互動的環節,雖然觀眾不知道發生了甚麼事,但大家都很尊重城城的演出,小美說:「成個騷嘅氣份係審慎而凝重,但城城好專業咁去完成成件事。完咗騷之後,我哋連夜執埋啲行裝同改機票,第二日一早返香港。我覺得當日城城所做嘅嘢唔容易,自己都好尊敬城城呢份專業,成個團隊都好敬重佢。」

小美指城城曾向自己講過「媽咪都應該希望我做好我自己嘅事業」,而小美本身亦覺得郭母一直以城城的事業為榮,而城城今次真的有做到。再問到城城收到媽咪死訊後有無喊,小美說:「佢喺我面前就冇,但喺我離開間房嘅時候,就見到佢眼紅紅。唔好話城城,我哋作為晚輩,經常都接觸伯母,自己都會覺得好難過。」

問到城城當時有無擔心在香港的太太方媛(Moka)及兩名女兒,又要面對處理郭母的後事,小美說:「嗰時都好好彩,因為家姐同姊夫喺身邊幫手處理,所以都唔使太擔心,同埋城城第二日一早就飛返嚟香港。」

講到城城未來的工作,小美指因為有武漢肺炎疫情的影響,所以巡迴演唱會暫時取消,而電影工作方面未開工,小美希望疫情快點過去,大家回復正常生活,生活得開開心心。

娛聞樂陪你走遍全球追星,即Like「娛果」FB 專頁!
BannerBanner