【生日飯有着落】張寶華終訂到餐廳 將向平機會投訴上海總會歧視

更新時間 (HKT): 2020.03.05 00:30

為了補祝黎芷珊本月1號的54歲生日,曾經與她同乘「疫輪」鑽石公主號旅遊的張寶華,原本特地在中環的上海總會訂枱慶祝,可惜日前被上海總會取消訂枱,身為該會會員的張寶華覺得被歧視而相當氣結。

噚晚張寶華轉移陣地,到尖沙嘴一間日本餐廳與芷珊食生日飯,原來是電台DJ老友林柏希幫手物色餐廳。她們抵達餐廳後,張寶華向芷珊送上一束鮮花及搓手液,而林柏希則送上生日蛋糕,芷珊許願後說:「希望疫情快啲過去,同埋大家要身體健康,百毒不侵!」及後再跟林柏希說:「得你肯收留我哋咋!」林柏希說:「你哋隔離咗,冇病徵,我點解唔招呼你哋呀!」芷珊續說:「呢個唔係必然㗎!」碰過杯後,張寶華笑說:「呢餐飯真係艱難。」

重提被上海總會取消訂枱,張寶華說:「起初以為拍攝,但佢哋回覆係老人家抵抗力嘅問題,嗰下覺得好愕然,我哋又唔係病人,咁你imply我哋係帶菌者啦,噚日新聞出咗,我要多謝《蘋果》,如果唔係佢哋唔覆我啦,其實我有問我幾時可以再嚟,佢答唔知,即係叫我以後唔好嚟啦,我梗係退會啦!」

張寶華聽取網民提議,會向平等機會委員會(EOC)投訴,她說:「我好希望平機會睇到呢段新聞可以嚟搵我,因為我今日做過資料搜集,喺香港牽涉歧視嗰4個法例,我哋今次件事又唔算fall into嗰4個類別,如果真係要related《殘疾歧視條例》,其實可能係related,因為你驚老人家抵抗力,imply我傳染,咁即係你覺得我有病,如果因為係病而唔招呼人哋去一個場所,其實可以fall into呢個類別。」她又說事件雖然不愉快,但只屬一件小事,希望可以退會籍並退還會費,她又自覺好彩,鑽石公主號算是當時武漢以外的最大疫區,與病魔擦身而過,並全身而退。

張寶華又說未曾想過會因為隔離而被拒絕訂枱:「我希望透過呢件事當係一個教育,因為受武漢肺炎影響嘅人一定有,可能佢哋都會遇到我哋同一樣嘅問題,小嘅叫你唔好嚟食飯,如果我租屋咁點?其實係唔啱㗎嘛!我目的唔係要告佢哋,唔係要佢哋上法庭,希望透過呢件事可以傳遞一個訊息,呢件係一個好不幸嘅事,如果我哋嘅社會唔要撕裂,要和諧,我哋係咪應該要糾正一吓自己嘅觀念呢!除咗用搓手液免受感染,戴口罩之外,都要有一個正確嘅知識,咁我哋已經隔離咗超過28日。」芷珊即說:「我係30幾日喇!」張寶華續說:「我係隔咗30日先至正式返工,今日係第40日先出嚟食第一餐飯,食飯係事小,平機會唔嚟搵我,我都會搵佢。」

問到上海總會會否退回會費?張寶華沒好氣地說:「佢冇覆我啦!我一早已經講咗,我話我唔嬲,但我有好多問題想問,咁佢哋答唔到我啦,其中一個問題係我幾時可以再嚟,佢哋話唔知,既然係咁,咁我退會,今日下晝3點幾又再問佢理事會有答覆未,佢都冇覆我。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner