【武漢肺炎】傅明憲呻加拿大防疫鬆懈 成功游說父母戴口罩自保

更新時間 (HKT): 2020.03.17 18:50

武漢肺炎疫情由中國湖北擴散至全球,繼西班牙、美國和澳洲後,秘魯亦宣佈封關。而特首林鄭月娥今早指外國的確診和死亡個案均已多過內地,料日內宣佈向所有外國(除中澳台)發出紅色外遊警示,所有入境者周四(19日)起均須強制檢疫14日。

傅明憲本月初飛往加拿大溫哥華探望父親傅奇和母親石慧,現時她於溫哥華附近的Big White Mountain滑雪,對於返港後要隔離14日,傅明憲今日接受《蘋果》訪問時表示:「我book咗今個月尾返香港,都唔會改機票趕返嚟喇,如果返到嚟要家居隔離14日,自己冇問題,因為喺屋企對住FiFi、文文同獅子頭(愛犬)係好開心嘅。」問到現時加拿大疫情,當地是否難以購買口罩和消毒用品時,傅明憲說:「我去開嗰間超市都見有好多廁紙同日用品,口罩就見唔到啦,不過我唔想兩個老人家四圍撲口罩,所以今次返嚟我帶晒畀佢哋,我喺香港買咗口罩、消毒藥水同搓手液畀佢哋,又喺超市幫佢哋入晒廁紙同糧食,淨係去超市我都走咗兩轉,其實我今次返嚟任務主要幫佢哋入貨,而家乜都搞掂晒,足夠兩老用。」

問到當地人是否抗拒戴口罩時,傅明憲說:「其實加拿大政府對防疫係好鬆懈,我見到冇乜人戴口罩,戴口罩幾乎全部都係華人,我父母初時都好抗拒戴口罩,但我最後都成功說服佢哋出街戴。我3月頭返到嚟,啲人完全無防疫意識,反而係啲唐人餐廳員工戴口罩,政府亦都冇宣傳片教人洗手洗20秒,又冇教點樣用漂白水沖渠,反而香港喺防疫宣傳工夫做得好好,今次返嚟我都教晒父母點洗手同沖渠。」

王賢誌家族經營旅行社舉辦的南美團上月底出發,王賢誌亦有隨團出發工作,《蘋果》今日聯絡上王賢誌,問他是否已離開秘魯返到香港時,王賢誌表示剛好在秘魯封關前飛抵溫哥華。王賢誌說:「我搭加拿大航空,喺噚日秘魯話封關前一日已經飛到溫哥華,本來準備18號喺溫哥華飛返香港,但班機突然間取消咗,而家都未知改到幾時,但19號香港封關前一定返唔到香港㗎喇,反正我之前去咗秘魯同玻利維亞好多地方,諗住返到香港都會自我隔離14日,所以就算返到嚟要自我隔離,我係OK嘅,我都唔會周圍去。原本星期日我同東華有隻團體馬『普仁』出賽,我都話咗我去唔到。」

問到溫哥華會否因為疫情影響市民搶購口罩和物資?王賢誌說:「口罩已經好早冇,其他嘢又唔係冇,不過呢度啲餐廳都陸續閂門唔開。其實呢度外國人真係唔多戴口罩,見到戴口罩嗰啲幾乎全部係華人。好彩我自己都有口罩同消毒用品,所以暫時都唔擔心嘅。」

娛聞樂陪你走遍全球追星,即Like「娛果」FB 專頁!
BannerBanner