【酒店自我隔離】崔碧珈今早抵港 稱美國人排華嚴重「你有冇菌」

更新時間 (HKT): 2020.03.20 11:44

武漢肺炎燃燒全球,早前留在美國洛杉磯工作的崔碧珈(Anita),為免媽媽擔心,日前終於撲到機位提早返港。今日崔碧珈坐航班於早上7時11分飛抵香港,經過檢疫及過關手續,她大約8時半步出禁區。推着一個篋的她戴上眼鏡、口罩、cap帽及運動裝束。另外,右手戴上追蹤手帶,並拿着一份政府文件公文袋,內裡有個人資料、「居安抗疫」流動應用程式及海外抵港人士的家居檢疫須知。

她心情輕鬆接受訪問,表示16小時機程中,只去了一趟洗手間,但全程沒有進食,只是用飲管飲水。她指航機上乘客戴口罩,有部份人穿雨褸,大概有7成乘客,她說:「我只係得對手套,因為盡力搵得手套,仲係廚房手套。」問到坐飛機會否有壓力?她說:「冇,可能好想返嚟,又做好防疫意識,我又將噴霧消毒藥水當香水噴,將個位周圍抹,喺洛杉磯反而驚。」當美國總統宣佈全力抗疫,當地排華氣氛轉趨惡劣,她坦言在歐洲讀書時也未遇過,她說:「有遇到冇禮貌說話、唔好眼神,都幾難受,例如講笑話你有冇病傳染我,又話有冇菌,問佢最清楚。」

她直言以前在外國多時都未遇過這樣種族歧視,她無奈說:「我喺屋企都忍唔住喊,因為好危險,啲人買槍都排長龍,氣氛又唔好。」眼見環境不理想,惟有聽媽咪說提前買機票返港,因為居住的荷李活區治安差,又驚人搶劫。在港檢疫過程不用太多時間,交表格後,再抽樣探熱,她沒有被抽中,最後佩戴追蹤手帶便可離開。

事後她坐媽媽駕駛的私家車到達尖沙嘴一酒店。她到埗後以搓手液清潔手部,再填寫健康申報資料,填妥文件後接受量度體溫,順利攞到房間。手續辦理完畢後,崔碧珈在酒店外受訪,問到她會否擔心被拒絕或投以不友善眼光時,她說:「唔善意又唔會,感受得太多(指在外地),香港好啲,我哋上網畀晒錢,都有驚過唔接受,但經過填寫健康紀錄,量體溫,都冇問題。」她帶瑜伽墊及琴等,在隔離時間解悶,好好利用14日來自我訓練,不想浪費時間,並會拍攝防疫知識片段放上網。

隔離期間,酒店不設入房送餐服務及執房,崔碧珈早有心理準備:「全部都會靠自己,有帶備清潔用品。」而飲食方面,她說:「盡量簡單,呢14日只會飲媽咪煲嘅湯,本身返香港要拍廣告,但因為呢14日遲咗,順便keep fit。」

曾有隔離人士不自律如常出街,無視隔離令,崔碧珈下榻酒店位於尖沙咀鬧市,會否心郁郁偷走?她堅決說:「絕對唔會,我個人好細膽,好奉公守法,而且手上面戴咗手帶唔會咁做。」並充滿疑惑:「戴咗手帶可以沖涼,但又唔可以浸浴,水蒸氣又唔知會唔會影響到條帶。」

娛聞樂陪你走遍全球追星,即Like「娛果」FB 專頁!
BannerBanner