【梁天病逝】開設藝員訓練班成巨星伯樂 安排周潤發拍《民間傳奇》賺外快

更新時間 (HKT): 2020.03.22 18:24
(左圖:資料圖片)

梁天是巨星伯樂,要不是70年代他向當時無綫戲劇組揸弗人鍾景輝建議開設藝員訓練班,今日周潤發、梁朝偉、劉德華等等也未必會成為天皇巨星。

60年代隨鍾景輝加盟無綫的天叔,70年代開始參與幕後工作,天叔有感當年電視台欠缺小生、花旦,加上沒有額外製作費請臨記,所以他便向鍾景輝提議開班招募人才。天叔2012年接受《蘋果》專訪時曾表示:「嗰陣我哋冇乜演員,《EYT》啲人又唔郁得,成日要上去求蔡和平(《EYT》話事人)借人,所以我就同無綫提議搞番個訓練班。1971年無綫開訓練班,由陳有后打理,第一期我冇教,因為我都好忙,又做演員又做導演,又拍電影又做《EYT》,後來黃錫照過麗的(亞視前身),鍾景輝過去幫手搵埋我,我先至教麗的藝訓班。」而麗的及亞視出身的黃秋生、何家勁、陳秀雯、萬梓良、尹天照、江華等等也是天叔學生,一生桃李滿門。

當然不得不提到天叔有份編導的無綫劇《民間傳奇》,該劇許多單元都是天叔負責,不僅家傳戶曉,而且更是今日無數巨星及製作人搖籃,因當年天叔拍《民間傳奇》,經常找訓練班學員演出,如周潤發、杜琪峯、林嶺東、前無綫金牌監製潘嘉德等等,在劇中扮家丁、店小二和衙差。天叔當年專訪中曾表示:「《民間傳奇》有好多都係我拍,嗰時唔夠演員,所以搵好多訓練班同學去做,呢套劇可以話係電視演員嘅搖籃。尤其佢哋啱啱入電視台人工好低,我哋就畀佢哋做衙差呢啲小角色,等佢哋搵多少少錢,周潤發當年住南丫島,拍得夜冇船返屋企,我咪索性畀佢接多啲通告,等佢收工喺公司瞓。發仔好乖好討人喜歡,我哋個個都好鍾意用佢。」

娛聞樂陪你走遍全球追星,即Like「娛果」FB 專頁!
BannerBanner