【賤嘴】梁思浩「震蛋論」涉侮辱柏金遜患者:橫掂都震

更新時間 (HKT): 2020.03.24 19:36

【新增回應】

梁思浩最近連番被踢爆人格有問題,先被盧覓雪斥踐踏女性尊嚴,狠批份人「賤」,林作又要敬而遠之。今日《蘋果》再收到來自英國的讀者彭先生投訴,指梁思浩在上周五(20日)主持的D100網台節目上,肆意取笑患有柏金遜的病人涉歧視,今早曾越洋致電香港平機會投訴,但該會卻不受理,令彭先生感到氣憤:「佢哋話法律告唔到,職權範圍以外,除非有患柏金遜人士投訴先可以,但有病嘅人點可以表達咁多嘢,完全保障唔到一啲有需要保護嘅人。」彭先生希望節目影片能下架或刪走相關話題。

記者上網翻睇該集內容,原本只是談「雞鴨本一家」,思浩提到古代的炊具,但拍檔李麗蕊(阿蕊)突然轉話題講震蛋,思浩大笑指應該搵柏金遜阿伯揸住,李麗蕊和陳彥行都說:「好衰!」但三人越講越興奮,梁思浩更笑到「扯晒蝦」,他指病人本身都手震,無謂浪費,更指如果自己是淫業大亨,會選擇新技師,將缺點化成優點...三人笑足5分鐘,思浩最後自己打圓場:「純屬笑話一則,並無不敬。」

不過,網民普遍插爆思浩的「震蛋論」侮辱柏金遜患者,一面倒鬧爆:「好好笑咩?搵呢啲嚟笑」、「他朝君體也相同」、「不知所謂,真係冇話題呢咩?」前大律師林作今日接受《蘋果》電話訪問,對於梁思浩在節目中譏笑柏金遜患者,他直言未必涉及性騷擾或民事責任,他說:「法律上搞佢唔到,但道德上肯定係錯!佢話講笑,戴幾多頭盔都冇用,呢啲人哋想㗎咩,咁都嘲笑人,道德層面上係極之錯誤。」

平機會晚上以電郵回覆《蘋果》表示:「處理投訴時須遵守保密和需要知情(need-to-know basis)的原則。」不會對個別案件細節作評論。平機會又呼籲當事人懷疑受到殘疾歧視,可以直接或委託他人作代表向平機會作出投訴。

對於梁思浩節目中取笑柏金遜病人,D100節目總經理蔡浩樑今日短訊回應《蘋果》:「《大家真風騷》是梁思浩與D100網台合作的一個獨立收費訂購節目,內容全權由真風騷團隊負責制定,編輯自主。該節目風格一向以嘻笑怒罵方式主持,關於有貴報讀者投訴的一段節目內容,節目負責人梁思浩已於節目內澄清並無任何惡意,亦接受其他主持對他有關失言的提示。而D100對有關內容對該聽眾所引起之困擾,表示遺憾。並已從YouTube 及重溫下載刪除有關片段,亦再提示各主持留意節目內的用詞。」

娛聞樂陪你走遍全球追星,即Like「娛果」FB 專頁!
BannerBanner