【獨家爆】無綫主持韓毓霞大半年冇工開 效力36年離巢:冇留戀

更新時間 (HKT): 2020.03.24 18:10

現年59歲的韓毓霞,1984年加盟無綫主持《體育世界》及大型體育節目,曾採訪過7次奧運,是體育節目殿堂級主持,可惜隨住無綫前年解散體育組,韓毓霞亦被公司投閒置散。據《蘋果》收到消息,韓毓霞過去大半年零工作,令她心灰意冷,而韓毓霞今日接受《蘋果》電話訪問時,直認本月跟無綫約滿後已不再續約,正式結束跟無綫36年賓主關係,繼劉江、敖嘉年和古明華後,又一資深藝人離開大台。

據了解,無綫體育組解散後,韓毓霞僅獲安排客串演《BB來了》,及客串兩集處境劇《愛‧回家之開心速遞》,記者今日問韓毓霞過去大半年是否不獲公司安排工作時,她無奈說:「唔係唔畀,咁冇體育吖嘛,咁畀乜呀?」記者指之前無綫也會安排拍劇,韓毓霞說:「我自己唔係好想接。」說到離開無綫原因,韓毓霞表示:「完全好和平、好平靜地,我都冇返到去,喺電話覆佢(藝員科),佢問我簽唔簽,後尾佢催我,我初初未諗掂,我話畀多個月我啦,過咗一個禮拜佢再打畀我話『其實你都心中有數㗎啦!』咁我話如果你要快,我答案就係唔簽囉。」

問是否被要求簽一個騷?韓毓霞笑說:「我唔記得啦喎!我哋呢啲做咗咁耐,就算每一次簽約加你5%、10%,積積埋埋都好襟計㗎嘛,咁你簽我去做一啲唔係話真係...好孭飛...我唔係劇出身㗎嘛,我只係好多時可以做一啲好點綴性嘅角色。在公司嘅立場嚟講,佢都好浪費囉,有時佢哋call我一、兩次返去做嘅角色,我心諗『你真係嘥公司錢。』我唔係話我自己好矜貴,而係相比起我會覺得『你個劇係咪有咁多budget㗎?』我都唔好意思,佢哋唔知嘅,啲PA淨係睇吓邊個得閒啫,佢哋叫我返去,我而家係少少紅色頭髮,佢哋話做個60年代掌櫃,個頭噴黑油都噴咗成粒鐘,然後做個角色,我好似拍咗9個字(45分鐘),真係好賺呀呢個騷。但問題我都覺得唔係好妥當囉,你搵個黑頭髮嘅人嚟做都得啦,唔使搵我,做做吓我覺得好似個booking system有啲唔係好有計劃。我都唔係做呢瓣出身,我做開體育㗎嘛,如果你話有奧運做我就唔會乜嘢啦,而家連奧運都唔搞,東京奧運都唔搞,咁邊有得做啫?咁咪算囉!同埋我都覺得自己做得差唔多啦,我都應該去第啲地方發揮吓,同埋搵自己第二啲興趣。」

韓毓霞本月已跟無綫合約完結離開,問是否對公司心淡?如前年無綫解散整個體育組?韓毓霞說:「咁我又唔會用心淡呢兩個字喎,我覺得係大勢所趨,冇辦法,大陸資本雄厚,以香港一間咁local嘅電視台嚟講,你要同大陸資本去fight 真係冇得fight,站在商業角度嚟講,我覺得係大勢所趨,冇乜話心唔心淡,如果你自己做老闆,你就話可以睇到勢色唔對,好似李嘉誠咁,我唔做塑膠花我要做地產,但你打工冇得咁㗎嘛!我又覺得鍾志光好叻仔嘅,佢轉營成功,我覺得好叻嘅,但我自己就覺得差唔多,我唔係好想咁樣。」

離開工作數十年的地方,可會捨不得?韓毓霞說:「其實唔捨得係當年嗰班工作人員一齊做嘢嗰種精神啫,唔係唔捨得間公司,因為此一時彼一時,而家成個氣氛、見到嘅人,同埋佢哋做嘢成個system係完全兩回事,所以冇乜唔捨得、冇乜留戀㗎啦。留戀嘅係當時撞到一班咁『圍威喂』、大家咁有團結精神同事,但都走晒囉,咁冇喇、冇得留戀喇!」

是否轉行?韓毓霞說:「唔㗎啦,我退休㗎喇!娛樂圈呢部份。我朋友就話喺第啲地方搞移民公司,叫我合作侵股,嗰時我就決定咗唔再簽啦,但後尾又有呢啲咁嘅COVID-19,又飛唔到去第度,要睇吓成個疫情點樣先至決定再pick up,所以而家都係退休狀態,而家係self quarantine狀態。」

娛聞樂陪你走遍全球追星,即Like「娛果」FB 專頁!
BannerBanner