【最新圖片】喬寶寶安全返抵蘇格蘭:差唔多8成人冇戴口罩

更新時間 (HKT): 2020.03.26 17:56

【新增回應、圖片】

現年50歲的喬寶寶在2006年參加《殘酷一叮》入行,不過近年被無綫投閒置散,於是在心灰意冷的情況下,決定提早與無綫解約,返回蘇格蘭一家團聚。雖然近年武漢肺炎疫情肆虐全球,英國等同沒有措施的「佛系防疫」,令皇儲查理斯都中招,不過喬寶寶為了家人,昨日起程返回蘇格蘭,他臨行前在社交平台貼了在機場禁區的相片並以英文留言:「再見香港,邁向英國的道路,無一樣東西比一個安穩的家重要,家是你成長的地方而離去,長大後想回去的地方,我的腳步雖離開,但我心繫這個地方,我愛香港,將會回來的!」

在出發前夕,與喬寶寶一向情如姊弟的黑妹姐,大家先吃了farewell飯,接着還送他入機場,喬寶寶說:「家姐真係好有心,佢專登畀封大利是,雖然近排大家都冇嘢做,家姐仲話臨走一定要同細佬食飯同去機場,仲話唔使叫咁多人,剩係我哋2個就OK,多謝家姐。」黑妹姐亦說:「我都唔知咩,13年喇,終於要離開我,不過佢好快會番嚟,希望佢返到去一家團聚,大家都開心、身體健康,快啲抱孫。」喬寶寶聽完後,抵死地說:「你知而家要隔離14日,我驚未抱孫,就做多次老竇!」

黑妹姐今日接受傳媒訪問,問到喬寶寶選擇在這段時間返英國,會否很危險,她說:「佢係返蘇格蘭,唔會去倫敦,本來佢係4月1日先走,我哋仲約咗29號食飯,但係嗰日佢坐嗰班機取消咗,得番噚日嗰班,所以咪即刻走,不過佢返到去都要隔離。」

剛剛回到蘇格蘭的喬寶寶,被問到當地的情況,他回覆《蘋果》說:「呢度差唔多有8成人都冇戴口罩,機場職員、保安同清潔全部人都冇戴,真係no eye see!」他還說:「可能香港之前經歷過沙士,所以喺呢方面嘅意識好強,但係歐洲人就唔會,最多只係有啲舖頭職員戴手套,口罩只得亞洲人會戴,真係好危險!」

現時喬寶寶會在家中自我隔離14日:「始終我屋企有老有嫩,我會留喺間房自我隔離,暫時隔住玻璃見吓面,老婆仲話冇乜必要都唔好落去廚房。不過而家咁嘅情況,我老婆同仔只係一個星期出去買一次餸,而且仲係大仔揸車送佢出去。」至於工作方面,他則說:「而家乜嘢工作都停晒,我喺呢段時陪吓屋企人,爭取多啲相處時間,最快9月先再決定返唔返香港!」

娛聞樂陪你走遍全球追星,即Like「娛果」FB 專頁!
BannerBanner