【老當益壯】96歲梅媽上月入院通波仔 聲如洪鐘:而家冇事啦

更新時間 (HKT): 2020.03.26 22:26
資料圖片

已故巨星梅艷芳的母親覃美金上月踏入96歲,兒子梅啟明在銅鑼灣為母親擺大壽,惟當晚梅啟明指梅媽感冒缺席,《蘋果》收到消息,梅媽早前因心臟有事入院,今日她接受電話訪問時表示:「之前通咗波仔,而家冇事啦,出咗院成個月,好番囉。」

梅媽聲如洪鐘說:「醫生話通完波仔冇嘢,唔使戴心臟起搏器,覆咗診冇乜嘢,不過隻腳又整親,起咗個泡,之前天冷囉,瞓覺用暖水袋燙到,起咗泡又穿咗,上嗰次係十年前都試過起泡,住咗一個月,而家又起番,埋緊口。之前坐輪椅出去覆診囉,都係朋友車我,我唔敢搭的士,啲菌咁大,街都冇出,出街唔戴口罩點得。一直都冇出街,喺屋企行嚟行去,但隻腳而家好軟,食西藥多,隻腳都冇咁力。」

梅媽還跟記者談起梅姐的往事:「阿梅細細個鍾意唱歌,我以前做中醫,喺彌敦道租咗成層樓,嗰時500蚊租,800幾呎,後面做住宅,表弟阿強喺啟德遊樂場做,每逢星期六返醫館又唱歌又打鼓,阿梅識唱《賣花女》就喺呢度學,嗰時3歲幾,『舅父,我唱首歌畀你聽。』『吓,你唱乜嘢歌?』『我唱賣花女囉!』『你識唱?』『你都唔玩嘢,我點唱。』表弟就攞二胡,阿梅成首《賣花女》唱晒,『表姐,呢啲係天才,你唔好埋沒佢。』」

梅媽指,梅姐童年時晚晚跟舅父去荔園餵大象,「啲人叫佢上去唱《賣花女》,到佢讀書,人哋落堂出去玩,兩姐妹喺學校做功課,返屋企就自己學唱歌,佢鍾意鄧麗君,買鄧麗君嘅歌,仲跟夏萍老公張雲學唱歌,阿梅正式師傅係張雲。」

娛聞樂陪你走遍全球追星,即Like「娛果」FB 專頁!
BannerBanner