【未婚夫係心靈雞湯】胡曦文圓亡母遺願搞慈善基金 下半生規劃要活得開心

更新時間 (HKT): 2020.03.28 00:31
攝影:沈健程

胡曦文的母親於2007年墮樓離世,她用了8年時間才走出陰霾,她早前到貧窮的印度和尼泊爾靈修,忽然「開竅」學會感恩,谷底反彈變回開心中女,兩年前又與未婚夫羅御軒(Joseph)擦出愛火,兩人還一齊搞JC Happiness慈善基金會,她去年更宣佈會籌備婚禮,待嫁新娘特別有幹勁。

胡曦文受亡母影響最深是行善,她說:「媽咪好有自己抱負,佢成日話呢個世界乜嘢都有可能,只要相信自己就做得到,媽咪做好多嘢鼓勵我,佢鼓勵我去做自己品牌,媽咪好鍾意笑,我朝早見佢就笑,佢嘅笑容好開心,好似BB仔,我都遺傳咗佢鍾意笑。」

樹欲靜而風不息,子欲養而親不在。問到胡曦文此刻可有甚麼話想跟天上的母親說?她說:「我好想對天上嘅媽咪講,你睇吓你個女我幾乖,做咗你想做嘅嘢,媽咪生前係好鍾意做慈善,而家我就搞咗慈善基金幫人,也有自己品牌,完成佢心願,真係不枉佢對我供書教學,我希望佢活得比我快樂。媽咪係我心中嘅天使,佢生前好鍾意笑,我一諗起佢就係佢笑臉。」胡曦文表示沒有事情後悔未跟媽咪一齊去做,「我媽咪走前成家人最後一次去咗日本旅行,我唔鍾意有遺憾,我覺得人生最大敵人係時間,一個人死咗,你唔可以叫佢返生。」每年3.17母親的死忌,胡曦文心中懷念媽咪,但如常工作和生活。人人都會面對不同的壓力,胡曦文就用堅強去抗壓,「我會逼自己堅強,如果有壓力時咪做吓運動,做吓瑜伽,去郊外望吓啲花草大自然,世界好大嘅,我會去行山,去戶外嗰3、4個鐘,我會閂電話。」

胡曦文近年專心搞慈善基金,她近日更跟溫碧霞(Irene)合作推出唇膏,為「護瞳行動」籌款。胡曦文先揀幫助眼疾人士,因為她留意到不少失明人士並非天生視障,只是生於窮困國家,未能得到完善醫療,「盲人嘅世界世黑麻麻,好無助,大家嚟買支脣膏好開心,同時都帶到快樂同幫助另一啲窮人。」未婚夫Joseph絕對是胡曦文的心靈雞湯,「佢好正面,好陽光,畀我好多正能量。以前好多唔同男朋友,每個都好好,我以前感情故事,好任性,有得也有失,但當中離合就學識好多嘢。如果全部都係得着嘅話,就冇嘢學得到。」她用栽花比喻發展一段感情,雙方都要悉心去灌溉。

胡曦文人生才走了一半,未來的人生規劃,她簡而清說:「要活得開心啲,調節好自己個心,情緒係好恐怖,我希望未來遇到乜嘢,每日都要開心面對,笑住面對,每日都簡簡單單。即使鍾意米芝蓮都唔使日日食,耐唔耐買啲靚嘢獎勵自己就得。自己要有夢想,前面係光明,自己可以創造世界,畫出彩虹。」

「快樂好短,冇咗就唔開心,可能你住開1,000呎屋企,冇咗份工要住番500呎,可能都會唔開心,但人總會有高有低,外面世界梗係會浮動有影響,樣樣計較會好辛苦。最快樂嘅時候要去珍惜,我珍惜而家呢一刻,每樣嘢都慢慢再去消化,只要學會感恩,睇嘢就唔同。香港人每日面對困難唔少,一定要自己調節身心。」胡曦文笑得率真,她此刻非常享受做「胡四萬」。

娛聞樂陪你走遍全球追星,即Like「娛果」FB 專頁!
BannerBanner