【全城禁聚】梁泰來信自身保護夠 趁戲院停業前睇雲迪素

更新時間 (HKT): 2020.03.28 18:20

全城禁聚下,為防止巿民聚集,多種娛樂場所暫時停業,戲院將於今日下午6時左右關門14天,在下午時份銅鑼灣JP戲院播映由雲迪素主演的《喋血戰士》,約有10數人趁禁令前趕入場睇新戲,從座位表所見,入場觀眾揀選的座位也分隔較遠。

《蘋果》在戲院門外遇見商台高層梁泰來開場前買飛與友人睇戲,他說:「想睇呢套戲,想睇雲迪素,因為套戲今個星期先上映,喺禁令前快啲嚟睇,因為唔知幾時先再有得睇。只要做好自己,我哋返工、搭車都係咁,相信戴咗口罩、做好自己措施就OK。同埋我入到戲院我會戴眼鏡,揀位會揀鬆啲、周圍冇乜人嘅。但唔會睇多幾套,只睇呢套,呢個檔期本身冇乜好戲揀,今日值得睇就來睇。娛樂禁令下冇乜影響,只係冇得飛。」

亦有喜歡睇戲的巿民在禁令前睇戲,但不會把握時間睇多幾場,陳小姐說:「一個人睇,因為朋友都要返工。禁令前特登嚟睇,本身都算係鍾意睇戲,見有時間就嚟睇,但唔會特登睇多幾套戲,太誇張,揀位都係揀番平時自己想坐嗰啲,對正中間螢幕嗰啲位。睇戲有啲風險,但自己出出入入都消毒洗手之類嘅,都夠安心。」

跟女友一起睇戲的鄺先生說:「同朋友嚟睇《蝶血戰士》,睇埋就冇㗎喇,平時都有睇開戲,今日特登嚟睇下。有戴罩,都唔驚有事,因為好少人睇,我見唔夠7個人睇,所以唔擔心。其實場內唔多人,又坐得鬆散,少人過酒吧又唔會對住傾偈,所以安全。我揀位時坐得好散都得。」另外巿民Sharon說:「同朋友嚟睇,都係2個人。唔係因為禁令前特登嚟睇,本身預咗睇,都冇乜人睇,唔怕高風險,揀位揀最好嘅。」

另外,《蘋果》亦去過尖沙嘴K11商場的英皇戲院和The ONE的戲院,剛欣賞完電影的夏小姐知道傍晚6時後戲院要停業14天才趕來看戲,她說:「我唔覺得戲院係一個高危嘅地方,因為戲院方面都做得幾好,分流坐都OK嘅。」她認為政府昨日推出的政策是多餘:「如果要禁就應該禁晒啦,封晒城啦,但你又俾啲唔俾啲,變成有一個灰色地帶。」

黎小姐就早有打算今日到戲院睇戲,她說:「戲院入面好少人,大家帶住個口罩,坐得好遠,所以唔擔心。政府呢個政策係廢嘅,應該早就全面封關,人係會走動丫嘛,你哋高官有咁嘅人工唔需要擔心日後,有好多住屋邨、劏房嗰啲手停口停,所以個措施係九唔搭八,你一係清晰啲停邊瓣,因為好多嘢都冇列明,你話有得支援,係咪支援埋我哋份工先,而家咁嘅環境,你唔去救市民,咁請問邊個救?民反就梗㗎喇,而家算冇乜罪案,如果再差啲搵唔到食,啲人咪搶囉,呢啲犯法嘢會出番嚟!」

至於王先生就趕尾班車入戲院欣賞停業前的最後一部電影,他說:「我唔覺得戲院係高危的地方,因為冇乜人喺入面,戲院做嘅措施又好,大家都隔開坐,我相信佢哋搞嘅防護措施搞得幾好。」是否覺得政府不需要推出這個政策?王先生表示:「其實戲院就冇呢個需要,反而可能係餐廳、酒吧需要啲,因為大家都坐得近。」這兩星期不能到戲院看戲,王先生惟有在家欣賞電影。對於限制4人以上聚集,王先生指應該會有幫助,但實際能否有幫助就要到時才知道。

娛聞樂陪你走遍全球追星,即Like「娛果」FB 專頁!
BannerBanner