【韓國爆紅】森美得戚晒「400次咖啡」:Love you 3000

更新時間 (HKT): 2020.04.01 12:34
(IG圖片)

韓國人氣「400次咖啡」熱潮傳到香港啦,森美、小儀、胡子彤、陳俞希(Hailey)都爭相在社交網晒相吸like,由於要瘋狂攪拌400次才有完美效果,有人成功有人失敗,小儀就整到發癲!

小儀雖然攪到地下都有咖啡,但都算大成功,不過就大呻:「終於整咗:發癲400次咖啡。點解發癲?我家裏冇任何手動或電動打蛋器,只可用匙羹(我中途試過加多一隻)去打呢個咖啡,唔只打400次呀黐線!手都斷呀黐線!第一次整,明顯賣相同完成品未滿分,但我會再整再挑戰嘅,因為的確幾好味又滑溜。最後,我右臂嗰舊鬼鼠拜拜肉,結實咗,有得着!」

由於要不停攪拌400次,少啲臂力都手軟,ViuTV主持陳俞希就中途放棄:「呢杯400咖啡,其實本身就好容易,但係唔知點解我可以做到捩咁棄?所以點解呢個叫做燒咗廚房系列點會係400次啊!」她拍了一條製作過程的短片,加文字配圖:「留意我呢個係加快鏡頭,點止400次呀」、「差啲粗口都講埋」、「好啦我放棄」。

在家隔離的森美就得戚晒相:「坐喺屋企一定肥系列,今日節目講過,時興嘅,Coffee 400,邊個打畀你飲,就係Love you 3000!」《蘋果》問森美是否整「400次咖啡」冧老婆?他在電話表示:「老婆整畀我㗎,佢話好多YouTuber同太太團整,佢咪整畀我囉,因為我每日都會飲咖啡,佢每日都會沖畀我,喺屋企隔離冇嘢做太悶,成家坐晒喺度,呢幾日都整好多嘢食,又整包又整燒賣又蛋糕又鳳爪,全部都係自己整。」

「400次咖啡」材料非常簡單,只需要咖啡粉、砂糖、溫水,比例是1:1,瘋狂攪拌400次成為泡泡奶蓋,倒在牛奶上即成,賣相超可愛,但就要有驕人臂力才能成功。韓國綜藝節目《新品上市 便利餐廳》演員丁一宇拜訪澳門咖啡店,被這杯焦糖奶蓋咖啡吸引,結果「400次咖啡」在韓國爆紅,韓星金英光、SF9成員在允都在社交網搶晒製成品。

娛聞樂陪你走遍全球追星,即Like「娛果」FB 專頁!
BannerBanner