【商業●電台】細So無悔與高層據理力爭:原來人情味得自己覺得有

更新時間 (HKT): 2020.04.06 06:00

每日工作營營役役,到傍晚拖着疲累的身軀回家途中,扭開收音機總會聽到一首Beatles的歌,和一把溫柔的聲音跟你打打氣,日復日年復年,漸漸變成大家的生活日常,暖着大家的心窩。

可是,上周五開始,大家放工時同樣的畫面已不一樣,說的是蘇耀宗(細So)上周五突然被效力近20年的商台「終止合作」,說白一點就是被「炒魷」,連想借最後一集節目向聽眾道別的機會亦欠奉。消息傳出後,同事、聽眾和網民們紛紛表達不捨及難以接受,細So接受《蘋果》訪問時,不諱言對結果感失望,並指商台的決定:「我就覺得冇人情味。」

經過一晚的沉澱後,細So翌日在貝澳家附近接受《蘋果》專訪,他形容上星期五是漫長的一日,感謝所有關心他的朋友和聽眾:「大家都無需要擔心,我冇特別唔開心,正如我所講,都只係失望啫。」

事實上,20年來的所有片段、經歷和回憶總不能像粉筆字般抹走, 夜闌人靜時一幕幕就如flashback般湧出心頭:「諗起我播過咩歌,講過咩說話,原來朋友同聽眾佢哋聽完後都袋住咗,而家到我用得着,佢哋就講番畀我聽,我當時都冇喊過,但而家講番起我真係有少少想喊。」感覺像這些年來每字每句每首歌都沒有白費:「我覺得自己呢20年冇枉過。」

遺憾是無法再透過音樂節目跟聽眾交流,諷刺是一個曾打算將一生奉獻在這崗位的人,最後甚至連向聽眾道別的機會也沒有:「我辜負咗大家嘅期望,辜負咗一啲習慣聽我節目嘅人。」細So直言佔了更多的是失望情緒:「原因竟因為一件咁嘅事唔能夠企到最後,記得我哥哥講過,只要做事光明磊落就冇嘢可以後悔,我夠膽講呢20年嚟我做嘅事都係光明磊落,我冇辜負哥哥亦無辜負呢句說話,但得嚟嘅就係呢一種缺乏人情味。」

今次事件起因有指是武漢肺炎爆發期間員工們需work from home的安排及減薪問題上,跟商台行政總裁陳靜嫻爭拗,結果代價就是細So失去繼續做節目的機會,如果有機會可以重來一次,細So表示仍然會據理力爭:「或者事前應該揭多啲書,希望自己聰明啲,睇吓仲有咩方法去表達,但我係真係無悔嘅,我嘅智慧只能夠選擇咁樣去做,我唔會後悔。」

在疫情陰霾下,不少打工仔都被迫要work from home,事發前的細So亦不例外,更稱要為一眾在家工作的人出一口氣:「咁多位老闆們唔好覺得同事喺屋企做嘢係偷懶,其實係仲辛苦咗,多咗好多工夫好多聯絡,無可否認唔係每份工work from home都可以有相同效率,咁咪研究吓點提高效率囉,咁樣先至令世界同制度有進步。」

可悲的是這世界遇到問題發生後,大部份都會選擇解決提出問題的人,細So繼續不吐不快:「老細們會覺得不嬲都係咁點解要變?因為你哋既得利益者梗係唔想變啦,但世界變咗喇嘛,每一分每一秒都變緊唔該你哋都求變啦。」

細So認為自己只是以大家的健康安全為出發點:「無論咩情況下都唔應該將效率或利益凌駕喺員工嘅安全之上,係絕對違反人類道德嘅,唔好同我講公司梗係賺錢,而家係關乎道德嘅事吖嘛,我唔會後悔講過呢啲說話,亦可能因為咁有人覺得忠言逆耳、唔想聽或者唔接受,所以就有咁嘅結果囉。」

有網民認為現在的商台已經漸變陌生,彷彿跟大眾越行越遠,細So這樣說:「好似人情味咁,呢啲嘢原來得我哋自己覺得有㗎咋喎,其實全世界都係咁,你以為有人情味但係到最後都係顧住自己,好悲哀但係事實,無謂美化佢嚟呃大家,只係無奈地我成為一個犧牲品。」

細So的離開的確令商台頓時變得愁雲慘霧,他說:「同事們嘅唔捨得、唔開心甚至流淚,我好多謝佢哋嘅眼淚,更希望我嘅犧牲可以令到部份人會蘇醒,其實我真係冇嘢㗎,但係我見到facebook上全日啲氣氛搞到我好似死咗咁,不斷俾人永遠懷念。」

除了同事和聽眾外,細So感恩家人們支持,尤其太太Wing在事發後在IG出Post,用詞相當勞氣,他說:「太太仲緊張同嬲過我,我話你嬲唔緊要但唔需要擔心,都有朋友問會唔會經濟有壓力?咁我都坦白講係會出咗問題嘅,因為少咗份收入,但又未到有壓力囉,我有手有腳仲會做嘢㗎嘛,所以放心。」

另一樣叫細So最不捨,是他做節目時的駕駛艙:「駕駛艙即係做節目嘅panel,有前輩講過只有做music show嘅人先會明,當你嗰日節目每一首歌、每一句說話、每一track都做得好好個感覺,嗰種滿足感就似做完一場好激烈嘅愛咁,所以最唔捨得嘅就係呢一種感覺,我嘅駕駛艙。」

來到訪問尾聲,細So有一些說話想跟來不及道別的聽眾講:「最後我想同大家講,雖然我冇得再同你哋生活日常啫,不過我可以喺日常生活裏面同大家見面,大家可以放心,多謝大家。Nothing's gonna change my world,所以最後我揀嘅歌都係Beatles 《Across the Universe》,送畀你哋亦都送畀我自己。」

娛聞樂陪你走遍全球追星,即Like「娛果」FB 專頁!
BannerBanner