【歌神開倉】Sam網上音樂會唱足20首歌 用維港美景做佈景

更新時間 (HKT): 2020.04.12 13:46

歌神許冠傑(Sam)將於今日下午5時舉行《2020許冠傑同舟共濟Online Concert》網上音樂會,為前通利琴行工程部失業員工加油,並為香港人打氣。

演唱會製作總監蕭潮順今午抵達海港城接受傳媒訪問,透露音樂會歷時約1小時,市民可於各大新聞媒體、網上以及流動平台欣賞阿Sam的表演。為顧及全球各地時差,Online Concert的片段將於香港播放時間4月12日下午5時起的24小時後,才在各大平台自動下架,讓全球華人都有機會觀賞到表演。

蕭潮順解釋:「Sam做騷從來都冇DVD,都係尊重偶像貓王,因為佢都冇錄影帶出,但全球有啲地方要兼顧時差問題,我哋唔想全球有任何一地方係miss咗,希望大家都有得睇。」為演唱會Sam已準備20首歌,蕭潮順笑言:「係歌神開倉,因為facebook呢幾日都收到好多歌迷點歌,大家有好多歌想聽,我哋會將啲音樂濃縮,唱多幾首。」向來親民的阿Sam亦會與歌迷在網上即時互動,蕭潮順續說:「歌神平時做紅館騷都係好親民,邊啲歌多人點佢就唱邊首,Sam一個人、一支結他都可以好似成隊band咁嘅效果,旦哥(鄭丹瑞)會睇住電腦,揀咗咩歌,大佬Sam就唱咩。」

為配合政府禁止群眾聚集的規例,活動場地只許工作人員進出,控制在大約10個人以內,大家並保持距離。問到Sam幾時會再開紅館騷?蕭潮順說:「原定7月做,但而家都要等個天決定,Sam都有提過,如果香港有其他場地演出都會book,始終紅館開騷申請都需要較耐時間。」至於今次製作費,蕭潮順直言阿Sam沒有收取一分一毫的演出費用,他說:「我哋都冇收入,係眾志成城,唔係錢嘅問題,好簡約嘅製作,我哋利用維港最大嘅佈景,既然唔使錢,香港最靚嘅景,一個屬於香港人嘅景,做幾靚嘅景都唔及維港個景咁靚。」

娛聞樂陪你走遍全球追星,即Like「娛果」FB 專頁!
BannerBanner