【add名人時尚】傅明憲揸機3年海底攝影 初戀鎚頭鯊靚相得獎

更新時間 (HKT): 2020.04.16 12:00

傅明憲愛潛水,潛水足迹遍佈七大洋,近年更迷上潛水攝影,將奧妙的海底世界、神秘的海洋生物,透過鏡頭紀錄下來。她去年拍攝的一條珍貴鎚頭鯊相片,上月更在專業海洋照片比賽得奬,令她喜出望外。

這幅名為《HELLO》的海底沙龍,巨型鎚頭鯊恍如和她正面對視,型態獨特,在日本《地球的海洋照片大賽》中得到優秀奬,「好開心!因為個獎好有歷史,已經超過50屆,第一次參加都有咁嘅成績,真係好開心,平時影咗啲相都係放IG、facebook,同啲朋友分享下,今次對自己係一個認同。」評判讚揚她的作品出色,已經超越了入門級數,「係2019年去哥斯達黎加嘅Cocos Island影嘅,個trip主要係睇鯊魚,當時影嘅心情好似初戀咁興奮,我哋一隊有幾個人,係分散晒嘅,好高興條鯊魚揀咗游嚟我度,仲要游到我面前,好慢咁轉彎,個感覺係個心跳到呢,好似初戀咁,個心撲撲跳,影完之後,啲潛水buddy係好羡幕。Hammerhead shark我以前有影過,但比較遠啲,閃光燈都唔到,今次就游得好近好近我,如果大家放大睇,係可以睇到皮膚啲紋。」

傅明憲曾愛上影野生動物,2016年開始用儍瓜機開始學海底攝影,「正式係2017年先學用單反相機,響海底攝影嘅講,我都真係仲係初哥,有好多嘢要學。」她覺得和海洋生物在海底相遇,要在一瞬間捕捉牠們的身影,以及火速調整相機等,非常刺激,「海底生物係唔等人嘅,唔同你在studio影人、影寵物,可以set好燈光、校曬角度,一路氹啲小動物,特別係wide angle影啲海底動物,係驚鴻一瞥,話過就過,中就中,唔中就唔知道幾時先再遇到。水底比陸上影動物更難,因唔係可以用zoom,因為閃光燈去唔到,就會變做藍藍灰灰咁,影唔到;一定要近,但太近又會爆光,所以好緊張。」

她指自己未夠班開攝影展,或教人,但非常享受在海底的感覺,「潛水攝影會有帶我去唔同國家,唔同海洋都有唔同類型嘅生物,佢地都有唔同特色、求生技能,令人嘆為觀止,越去得多唔同地方,越見得多唔同生物,越覺得自己渺小,而自己覺得自己渺小嘅感覺,係好正!」

娛聞樂陪你走遍全球追星,即Like「娛果」FB 專頁!
BannerBanner