【港版國安法】王喜擔心三權分立失守 率先刪facebook賬戶保身

更新時間 (HKT): 2020.05.22 17:10

「一國一制」提前實現!全國人大會議將宣佈立「港版國安法」,不足24小時,香港人驚恐不已,資金最誠實,恒指大跌。香港人驚被秋後算賬,考慮移民數量急增,亦要諗定方法保障安全。

王喜日前被點名剔出《頭條新聞》,社會可以正常監察、批評政權的自由都蕩然無存。今日王喜在YouTube上載片段,教人刪除facebook賬戶。王喜初時仍強顏歡笑:「哈哈,從來都冇諗過要教呢樣。」其後他解釋:「原因大家都好清楚,人大宣佈咗喺香港設立一啲國安機構,就住佢哋一啲標準,好似話包括顛覆國家、勾結外國,呢啲機構去執行國安條例。」

王喜擔憂新國安機構成立後,安全受威脅、香港不再是香港:「到時由拉人、起訴到判刑,仲要唔要香港三權分立機關處理?好有可能已經唔係。」他透露未知草案有否追溯力,但為安全起見,接受了律師朋友建議——刪除facebook賬戶:「因為唔知自己轉發嘅post,會唔會其中有啲畫面或者圖案係寫住『天滅中共』,就算post內容同呢個圖案無關,我都可能已經中咗招。」

王喜強擠出笑容講:「都老實講,我FB都已經被人由頭到尾備份,我都已經走唔甩喇,哈哈,不過走得甩就走啦。」王喜示範刪除facebook賬戶步驟,大約十分鐘完成,他說:「有幾個原因畀你揀,我呢刻會選擇『我覺得FB不安全』,我係驚被舉報……哈哈。」

最後王喜在鏡頭前按下確認鍵與多年賬戶告別,他向觀眾說:「喺呢度要向喺FB支持過我、一齊笑過嘅你陪伴我,facebook都帶畀我哋好多回憶,但我哋係時候講拜拜。」他傷感地希望香港人都可以安安全全:「希望大家揀一條可以安全生活落去嘅路,唔好諗太多未來嘅嘢,搵一個比較安全嘅地方同你啲小朋友一齊去過。」

娛聞樂陪你走遍全球追星,即Like「娛果」FB 專頁!
BannerBanner