【微博圍爐成功】曹永廉貼梁競徽P圖 致敬消防變撐「港版國安法」

更新時間 (HKT): 2020.05.30 23:21
(網上圖片)

全國人大通過「港版國安法」,香港即將面臨一國一制。正當藝文界對「港版國安法」表示震驚、憂慮和憤怒的時候,噚日香港文化演藝界卻發聯合聲明表示支持「港版國安法」,聯署中更有「愛國骨幹」譚詠麟、成龍、鍾鎮濤、陳小春等藝人。

今日,同樣有喺支持名單中嘅愛國份子之一嘅曹永廉,就喺微博中貼出一張梁競徽(前名梁烈唯)攞住寫有「支持立國安法 維持香港安定」紙張嘅相,而曹永廉當然有留言表示支持。但問題係睇番徽徽嘅微博,發現近一星期佢都只係活喺自己世界裏面,完全冇出過有關「港版國安法」嘅post。而再睇真啲,徽徽呢張攞住支持立「港版國安法」嘅相,其實係喺2016年​向拯救淘大工業村迷你倉大火的消防員致敬時影,而紙上本來係寫住「#向前線消防員致敬」。最有趣嘅係,當年曹永廉其實都有影過呢張相。咁到底徽徽呢張由支持「消防」變成支持「立法」嘅相喺邊度得番嚟?定抑或係曹永廉幫徽徽P圖?咁就真係要問番曹永廉先知喇!雖然呢張只係P圖,但曹永廉就成功誤導咗一班喺微博圍爐嘅大陸網民留言讚好。

其實自徽徽由2015年喺自己微博post咗一張向抗日老兵致敬的相,更加上「祖國萬歲」呢句擦鞋式表忠留言後,徽徽就一直開始深得網民愛戴,除咗幫佢製造大量P圖外,更帶住佢嘅相去遊行成功令佢衝出國際,不過最後就搞到徽徽要退出IG,專注喺微博發展。

娛聞樂陪你走遍全球追星,即Like「娛果」FB 專頁!
BannerBanner