偷食後14個月再出發 Sammi勉勵要真心 
安仔戴婚戒復出「我100%做得更好」

更新時間 (HKT): 2020.06.16 02:20

許志安於「安心偷食」後停工14個月,昨晚7時首次復工,為ViuTV節目做嘉賓,為復出試水溫。戴上婚戒的安仔,錄影前向傳媒剖白過去一年多的心路歷程,談到太太鄭秀文(Sammi)支持他復出,他眼濕濕表示︰「太太都有同我講,要100%信心、正面及真心。」但提到黃心穎,他則說︰「呢啲傷痕令我警醒自己。」並堅定承諾︰「我100%做得更好!」

大批傳媒昨日早於許志安及鄭秀文(Sammi)位於淺水灣道的寓所等候,下午4時20分,穿上黑白恤衫的安仔由助手陪同,乘坐七人車到尖沙嘴髮型屋,到達後,手上戴着婚戒的安仔,落車時戴回口罩,對所有提問一概不答,他向在場人群揮手示意後,即低頭入髮型屋,直至黃昏6時許,安仔離開,現場有fans上前送禮物給他,他接過禮物後登車離開,繼續封口。

緊張失眠 提Sammi鼓勵眼濕

晚上7時許志安現身九龍灣E-Max為ViuTV節目《寶麗金50周年Chill Club》錄影,復出後首次與傳媒正式見面,安仔難免戰戰兢兢,電視台安排傳媒探班時亦定下兩大規條,一是只接受報紙及電子傳媒兩組圍訪,不作個別訪問,二是探班期間不能現場直播。安仔滿面笑容,久沒公開講話的他開腔顯得有點緊張:「好耐冇見,今日係寶麗金50周年,自己好開心嚟到呢度。以前自己屬於正東。」當年他簽約寶麗金旗下label正東,創下最光輝年代,2001年在無綫「勁歌」首奪「最受歡迎男歌星」,並向Sammi發表「廚房宣言」,對二人別具意義。

安仔續說︰「經過呢段時間沉澱、靜思、反省、自己學習,成長好多,呢段時間有困難,每次面對自己都會反問起點喺邊度?好盡力咁向前望,今日係好timing。」安仔指這段時間花了很多時間陪家人,家對他很重要。問他是否正式復出?安仔未敢肯定:「唔敢講,因為疫情關係,好多嘢都諗唔到。我只想畀大家知道,我準備好,我100%肯定充滿信心咁覺得會做得更好。」安仔透露昨晚因緊張失眠,提到太太Sammi鼓勵,他眼濕濕說:「都有問自己係咪ready好?太太都有同我講,要100% ready、有信心、內心要正面、出嚟時要真心。呢一年都有問自己,係咪可以承擔,見咁多人,我都有少少緊張,但緊張都要面對。」

安仔又說:「呢段時間我有好好咁修理自己,我哋隻狗Lucky已經15歲,要花好多力氣去照顧佢,我喺佢身上學懂珍惜。雖然佢已經進入倒數嘅日子,但我都希望佢開心啲,唔好咁痛苦。」

拒談心穎 「傷痕唔會忘記」

問到有否跟黃心穎聯絡?許志安神態自若說:「冇喇,以前嘅嘢過去咗,大家畀啲時間我,我明白一時間要大家接受需要時間,自己嘅錯誤、傷痕,唔會忘記。我會警醒、提醒自己,未來我有信心做得更好。」談到馬國明為他送祝福及馬明新戀情曝光,安仔表示:「我有睇到報道,但留番佢哋自己講。」問到復出最想感謝哪一位?安仔說:「要多謝朋友、屋企人鼓勵,當然仲有Sammi。又好似Joey Tang咁,之前邀請我,但係當時嘅我未ready,婉拒咗。」去年安仔的演唱會最終取消,問到可有計劃再舉辦?安仔表示暫未有打算,談到有報道指他會擔任梁漢文演唱會嘉賓,安仔說:「佢未邀請我,但佢邀請我一定支持。」安仔錄影完畢即返回淺水灣寓所,相當深閨。

娛聞樂陪你走遍全球追星,即Like「娛果」FB 專頁!
BannerBanner