【黃藍家庭】袁彌昌勸金黃老竇避風頭 撐藍絲老婆容海恩有分寸

更新時間 (HKT): 2020.07.04 00:30

一個家庭,有金黃老竇袁弓夷、深黃妹妹袁彌明,藍絲老婆、新民黨立法會議員容海恩,夾在中間的袁彌昌卻自稱是綠色的 「事實派」。

袁弓夷上月全力聯繫美國官員協助港人,既去信美國總統特朗普和美國國務卿蓬佩奧,還親身飛到美國華盛頓會晤眾議院共和黨議員佩里(Scott Perry)和美國共和黨眾議員約霍(Ted Yoho)。6月30日深夜開始施行《港區國安法》,香港面對巨變,自由立即被收窄。袁彌昌在港區國安法條文公諸於世之前,於灣仔接受《蘋果》訪問,已擔心言論惹火的老父回港有風險,他並不主張袁弓夷返歸,袁彌昌認為他現階段只宜留在美國避風頭,他指全家不可在港團聚着實是悲劇。

袁彌昌稱讚老婆容海恩有分寸,「佢都係一個從政嘅人,佢知道邊啲幾時講,幾時唔應該講,佢唔會特登去撩啲嘢出嚟。爹哋好鍾意發表偉論,就算邊個喺度,佢都會講,佢唔係鬧人,佢會講中共好衰,太太明嗰個始終係佢老爺嚟,唔會加意見。」袁彌昌笑言自己算是家中共融的橋樑,「個個男人都要做呢啲嘢,好似婆媳關係咁,中間要人疏導。有時我媽咪睇到老婆喺立法會講咗啲嘢大家唔高興,我中間要斡旋吓、緩和吓,係天下最難唸的經,就算我讀戰略,係幾叻政治家都未必解決到。首先要有道防火牆,等佢哋唔好燒着先。」若然見到勢色不對,一有dead air或奇怪氣氛,袁彌昌就叫大家吃喝扯開話題,他說:「我係學者會好啲,我企中間做思考部份。」

堅稱非藍的袁彌昌指跟藍絲老婆相處沒問題,他說:「我哋始終都係兩公婆嚟,唔好當我哋係唔同政治嘅人。」袁彌昌自爆經常留意太太喜怒變化,「有時佢心情唔好,我唔會特登講,我係圈內人知內情,有啲嘢唔使用語言講明白,有啲嘢我明白佢,外人未必知佢苦處同掙扎位,我會體諒安慰佢。大家唔使放大我哋政見上分別,其他夫妻都有好多嘢有分別,我唔係要娶個女人版嘅袁彌昌返嚟,我要容海恩。」袁彌昌公然護妻。

袁彌昌認同政見有異會影響家人關係:「政見係好麻煩嘅。」袁彌昌和容海恩兩年抱兩,育有兩女分別一歲半和半歲,他表示夫妻年紀都不輕,兩個夠晒數,無意追仔;至於教育下一代,袁彌昌會依從父親袁弓夷一套讓女兒自由發揮,並培養理性思考和獨立思維。不少家長眼見香港現況已作出移民計劃,但袁彌昌卻不準備離開:「真係走咗,下一代就會冇咗香港嘅身份,同冇咗呢個根,畢竟我同老婆成家都喺呢度出嚟,我同老婆都冇其他國籍,我得本BNO,兩年前補領嘅,太太都仲未補領。」

娛聞樂陪你走遍全球追星,即Like「娛果」FB 專頁!
BannerBanner