【數臭人渣】陳振華拋妻棄女失蹤成年 老婆開腔:忍無可忍

更新時間 (HKT): 2020.07.06 13:29

曾拍大台劇《金宵大廈》的印度裔香港演員陳振華(Ricky),昨日被老婆Alison在社交網撰千字文控訴八宗罪,包括為大陸女伴拋妻棄女、欠交學費令女兒失學、虐打女兒至流血、借街數唔還錢、玩失蹤後取消公屋令妻女流離失所等,網民狠批Ricky 為人渣。今日Alison 接受《蘋果》電話訪問激憤說:「忍無可忍!」

33歲的Alison是香港人,跟Ricky結婚6年,對於公開老公惡行,她解釋:「本身唔想搞到乜,但忍無可忍。」由於Ricky玩失蹤,兩人的離婚手續一直未辦妥:「WhatsApp唔睇電話唔覆,正式失蹤都有年幾,對上嗰次都係搵人去大陸搵佢拍嘢,我唔知佢喺邊,離婚嗰度好麻煩,畀唔到信佢,如果要搵大陸司法部搵佢又要錢,因為佢一直冇出現簽紙,而家搵法援幫手。」

獨力湊女的Alison,雖然面對經濟壓力,但婉拒親友幫忙,「佢哋成日話畀錢,但我冇攞到,因為長貧難顧,都係自己捱緊,等社會福利處幫。早排有返上水農場做part time,但呢3個禮拜冇工開,有得返可以吊住鹽水先,因為嗰度可以帶埋個女餵蚊,係好慘,但個女一定要黐住我,冇辦法,冇人湊。」她坦承經濟好大問題,「銀包咁多使咁多,我老爺都有畀錢幫吓手,1000蚊,呢排有畀少少咁囉,我哋一直有聯絡,關係都幾好。佢連佢阿爸都冇聯絡,最近老爺都暈咗幾次,過兩日我同佢睇醫生問平安鐘。」

兩人的女兒今年6歲,Alison聲稱Ricky曾對囡囡家暴,囡囡有冇問起爸爸?她說:「冇。」囡囡對爸爸有甚麽感覺?她坦言:「有啲唔係咁鍾意,好鍾意同佢鬥氣。」Ricky唔錫囡囡?她說:「以前好啲,上完大陸,有第二個女人,突然間個人變晒。」現在跟女兒住哪兒?她說:「呢個唔講,唔想啲人騷擾,知佢有借財仔。」

娛聞樂陪你走遍全球追星,即Like「娛果」FB 專頁!
BannerBanner