【疫情所累】音樂劇《我們的青春日誌》取消所有公演 劇場慘蝕數十萬

更新時間 (HKT): 2020.08.02 16:59
(互聯網圖片)

武漢肺炎疫情嚴峻,演唱會、舞台劇、粵劇等演出相繼延期或取消,由陳恩碩(Tom)創作、監製及導演的音樂劇《我們的青春日誌2020》,繼上月宣佈取消7場公演及延期開騷後,今日再宣佈決定取消餘下所有場次的演出,Tom今日凌晨在Facebook表示:「已經冇extra錢再繼續燒,好難無了期咁等,音樂劇《我們的青春日誌2020》跟住落嚟嘅場數會全數取消,想同準備遲啲嚟睇嘅朋友講聲唔好意思。其實仍然可以開到27場已經好感恩,喺呢一刻只係希望疫情盡快過去,大家身體健健康康。我哋一定會再返嚟!」

由Ben Sir、杜小喬及多位舞台劇演員參與演出的《我們的青春日誌2020》,6月起開始上演了27場,38場門票早已全部售罄,音樂劇原本加開至66場,Tom曾表示有意像外國長壽劇不斷演下去,不過疫情變數有很多,取消實在是無可奈何。於音樂劇已多番順延及取消演出帶來的虧損,Tom透露小劇場演出以大劇場規模製作,取消演出後虧損達數十萬,所以短期內都不會再投資任何劇目,他說:「我要向準備嚟睇音樂劇的嘅朋友講聲唔好意思,因為好多朋友買咗8月嘅門票。 」

其實音樂劇演出以來,觀眾多次催促製作原聲大碟,Tom亦有好消息宣佈:「我已經同旦哥密鑼緊鼓籌備原聲大碟。如果fans支持,會推出網上音樂會。既然而家取消咗音樂劇演出,希望盡綿力將娛樂帶畀大家,亦係當初疫情之下仍要堅持演出嘅初衷,好想疫情中與大家同行互勉! 」

此外,Ben Sir接受《蘋果》訪問,回覆指:「取消所有演期,自不然有可惜同唔可惜,唔可惜係因為已經做晒我嗰個part,我都做咗28場(加去年演出),只係淨返3場左右,都叫做滿足咗我啲戲癮,可惜係透過10幾場,我先搵到個角色,同埋導演話我近呢幾場,我啲唱歌越嚟越好,滿腔熱誠,諗住將優美旋律、優美歌曲帶畀觀眾,但係咁樣觀眾唔能夠欣賞到我嘅歌聲,雖然係得嗰幾句,但係都有啲可惜。講返正經,最可惜就係我哋呢個現場表演行業嘅朋友,要諗一諗,喺疫情之下,點樣去變通,點樣轉型,例如音樂劇嚟講,轉去拍電影得唔得呢﹖出原聲大碟又得唔得呢﹖呢啲有冇疫情都係咁做,問題就係將呢啲現場表演嘅嘢變成用網絡去表演又得唔得呢﹖將3D變成2D畫面,當然唔係音樂劇或者舞台劇表演嘅原意啦,所以呢啲係值得我哋去加速去諗一諗。」

最後,BenSir不忘多謝Tom的支持:「多謝導演嘅栽培,令到音樂劇界嘅朋友認識到我呢個新人,將我帶上去音樂劇嘅舞台,我好衷心感謝佢,導演仔冇同我呢個成年人有隔膜,真正做到we connect。」

娛聞樂陪你走遍全球追星,即Like「娛果」FB 專頁!
BannerBanner