【自責照顧不周】林子博太太腫瘤劇痛入院 憂心忡忡求妻平安

更新時間 (HKT): 2020.08.02 18:19

林子博太太董燕君(Shirley)去年發現患上極罕有癌症「平滑肌肉瘤(腹腔)」,其時子博又適逢失業,禍不單行,Shirley去年底完成為期半年的化療療程後,一直休養,至今年3、4月子博出席活動及為推出新歌宣傳時,終於為太太報喜訊,分享太太逐漸康復,情況樂觀,更指太太頭髮重新生長回復自信,一家人對此也鬆一口氣,積極面對抗病之路。走過低谷後曙光初現,但Shirley近日情況突然危急,腫瘤劇痛,昨晚由子博陪同送院,並需留院,子博接受訪問時說:「噚晚送咗太太入院,因為太太腫瘤好痛,其實痛咗幾日,佢一路想撐住,睇吓會唔會好啲,但連落床都有困難,又暈又嘔,去唔到廁所,冇辦法一定要去醫院。適逢星期六日,平時睇開太太位腫瘤科醫生應該要明天先返工,而家留醫腫瘤科病科,相信聽日主診醫生應會follow情況。」

由於疫情關係,醫院不設探病時間,子博只能透過WhatsApp和太太溝通,情況令人憂心,他說:「太太仍然又暈又嘔唔舒服,現時食住止痛藥止痛先,只能透過手機睇佢有咩需要就帶去醫院。」子博又指太太近日服食了兩個星期標靶藥,發現不太適合,加上又有副作用,所以沒有再食,子博更自責:「都係我照顧得佢唔夠好,照顧得佢好啲就唔會咁。」

除了擔心太太病況,子博語帶失望表示:「原本聽日獲得王賢誌介紹睇位中醫,佢好好,仲幫我安排埋喺銅鑼灣攞輪椅,再轉乘輪椅的士去油麻地睇中醫,但而家都要取消,只希望太太冇事可以快啲出院。」子博要獨力擔起家庭,幸好一對子女林詠渝和林卓楠十分懂事,子博亦沒有將情緒帶返家。雖然舊公司無情但人間有愛,子博失業後仍有不少工量撐住,好友紛紛伸出援手,不單可以推出新歌,又為有線拍攝節目,近月獲馬浚偉邀請參與9月舞台劇《男人40 CEO》演出,令子博感激不盡。7月初時子博49歲生日,一家四口食飯慶祝,Shirley亦於FB上載夫妻合照,留言冧老公說:「老公,生日快樂!噚日掛住同你慶祝,唔記得咗喺呢度同你講生日快樂㖭!祝你心想事成(我知呢個祝福最着數,要乜有乜!)#我愛你 #原來我哋好少合照」。

----------------------------

娛聞樂陪你走遍全球追星,即Like「娛果」FB 專頁!
BannerBanner