【催足半年】吳剛涉拖欠3萬多元Eason個唱門票錢 受害人報警求助

更新時間 (HKT): 2020.08.13 22:25

一提吳剛師傅,大家都會想起他在《歡樂滿東華》赤膊搽油食炭飲滾油等等經典場面,不過隨着他90年代尾淡出娛圈做生意,吳剛師傅行蹤亦變得低調。去年底無綫本邀他出席《善心滿東華2019》,但開騷前吳剛卻突然以病為由甩底。

64歲的吳剛90年代善心滿瀉,熱心公益,但近年卻屢傳財困,多年前轉型做飲食生意及當上「藍店」富臨宴會部總監的吳剛,去年被指2012年時被頒佈的破產令被延長到去年7月,而近日更有讀者向《蘋果》爆料,指吳剛拖欠他3萬多元陳奕迅演唱會門票錢未退還,已就此報警求助。

讀者孫先生日前向《蘋果》爆料,他指去年曾向吳剛訂購一批七折餅卡和34張《陳奕迅Fear and Dreams香港演唱會19/20》門票,門票乃是代友人一起於去年9月跟吳剛訂購,每張980元,即合共33320港元,全部已付錢,吳剛當時給孫先生遞上的名片,仍然任職富臨宴會部總監。孫先生指吳剛去年先交收餅卡,後來陳奕迅的25場演唱會因受社會運動影響要取消全部場次,主辦單位其後陸續在今年4月底前完成全部退款,可是孫先生至今仍未收到吳剛退款,多次催促吳剛都未有安排,對方甚至失蹤失聯,孫先生無計可施下,於是在7月13日到紅磡警署報警求助。

孫先生說:「我一開頭係同吳剛接洽,舊年11月話開唔成,大會都公佈咗退款詳情,佢哋原本話12月會退番錢畀我,於是咪等佢,次次搵親佢都話再一個月,之後有個女人自稱吳太嘅人聯絡我話一定退,一時話喺大馬未返港,一個月又拖一個月。」

孫先生續說:「4月底時,吳剛有回過短訊,佢自稱病咗喺深圳留院,佢仲傳咗一張瞓病床相過嚟,仲話自己身體唔舒服,要稍遲先過到數,佢自己話要多補5000蚊畀我做利息,當然最後又係唔肯畀退款,拖到7月時,我都有同吳太講仲唔畀錢我去報警,佢選擇性覆吓又唔覆,更退咗group,好冇誠信。吳剛7月中係WhatsApp過我一次,佢聲稱『很抱歉正在治療,遲了覆你。身體不適正在治療,給你帶來不便,萬分抱歉難過,敬請原諒原諒』,而家都8月喇,近日搵佢哋又完全冇反應。當中啲錢唔係全部我嘅,仲有我幫朋友訂飛嘅錢。」

孫先生更向記者提供吳剛去年9月時收下他訂票款項而手寫的收據、今年7月13日報案文件,以及過去半年跟吳太多次對話的WhatsApp截圖,可見吳太的對話內容全部是「拖字訣」。

《蘋果》發覺吳剛近年不停更改手提電話號碼,日前致電他最新號碼,電話雖接通,但他未有應機,WhatsApp也未有回覆,吳太日前有接聽電話,但一聽到記者表明身份,她立即cut線,吳太的WhatsApp也是已讀不回。《蘋果》今日再先後聯絡吳剛夫婦,但他們仍然潛水,未有回覆。

就孫先生在7月13日到過紅磡警署備案,警察公共關係科今日回覆《蘋果》證實上月有這個備案,指有孫姓男子稱被吳姓男子拖欠約3萬的演唱會退款不還,孫姓男子將作民事起訴追討。

-----------------------------

娛聞樂陪你走遍全球追星,即Like「娛果」FB 專頁!
BannerBanner