【娛樂人物】條數係咪咁計 陳欣妍

更新時間 (HKT): 2020.08.16 02:00

陳欣妍說自己計數好差,偏偏關於她的新聞,離不開各種數字,如最近《辣伙頭.開火》的88蚊海南雞飯和36蚊下午茶;早前《美女郊遊遊》泳裝行山宣傳片展露的34C身材,連條鼻涕都有3吋引來熱話⋯⋯短短4個月已成為網民新女神,算是疫情下的小福利吧!

「人比人就會比死人,我覺得自己性格有啲儍大姐,我計數好差,唔係話讀書嗰種計數喎,原來人生嘅計數我係好差!」

雖被批在節目中的88蚊一個海南雞飯定價離地,但觀乎陳欣妍自己一個來到影樓,左孭一個宜家藍色大購物袋在膊頭,右孭一個小手袋也不是甚麼名牌,女神也算貼地。她說自己不好名牌,因為收入根本付不起。不過,名牌包包其實不用自己買,可以等人送的!

正如88蚊一個海南雞飯有人覺離地,但連登仔的正解是「畀$88見到陳欣妍抵啦」、「$87食陳欣妍個樣$1食海南雞飯」⋯⋯條數係咪咁計?

撰文:文嘉龍

攝影:林德雄

去到好盡但唔好全裸

陳欣妍很喜歡在Ig寫長文,明明發一個限時動態,都要打一大段文字。她的粉絲人數現在有9.5萬人,由4月的《美女郊遊遊》爆出後,人數倍量急升。被人批評她在《辣伙頭.開火》定價離地,她亦寫下長文大費周章解釋,其實,貼一張性感照讓網民消消氣,不是更實際?條數應該係咁計!

「我又唔係話唔開心,但係我自己睇返節目播出,自己變返一個觀眾身份,我都覺得唔得喎!你抽身返去拍攝,個人真係一頭煙,尤其是第一集,仲未清楚節目重心應該要點,其實我前一、兩日已經去搵咗朋友間餐廳,睇人點樣做海南雞飯!我本身識煮嘢,但係唔叻囉!」

最驚計數的陳欣妍說:「今集(新一輯)難度係由BB班去咗打大佬班,除咗要煮嘢食之外,你仲要顧及餐廳營運,你又要諗去邊度入貨,又要諗運輸係點樣,之後你又諗點樣計數,我最驚計數,所以今次我覺得好難呀!」88蚊一個海南雞飯就此引來話題。

開火拼廚藝還要用腦,難度自然來,總不及兩個美女郊遊行山的CP值高。因為《美女郊遊遊》才令陳欣妍彈起,更被網民封為新一代女神,「我本身有做開運動,但真係未試過行足十幾個鐘,行咁多山真係未試過。我冇諗過會被人封為女神,純粹覺得有嘢做好開心,有種成班friend一齊出去玩嘅感覺。」

雖說陳欣妍愛在Ig寫些文青類文字,其實她都很懂在適當時候派福利,這張內衣那張水着,蜜桃臀行股惑是最強武器,「其實我𠵱家都唔係好算行緊性感,我介唔介意呀?其實我入行都係想做一個演員,拍戲底線可以去到好盡,但唔好全裸!到𠵱家都冇人撩過我出寫真呢件事,我比較鍾意寫嘢,我都諗緊累積一啲我寫嘅嘢,然後出一本書,如果冇人買,可能出幾張圖啦!」去到好盡但唔好全裸,條數係點計?

有好多同路人一齊

入行前的陳欣妍,本名叫陳曼姿,中學讀聖士提反女校,大學在理工修讀廣告設計系,參加過雜誌舉辦的校花校草選舉,又參加過街頭的型男潮女比賽,她說那次純粹為幫朋友「湊數」登記才去參加。真正令她有機會入行,是發生在酒吧的故事。

「我大學畢業之後去咗旅行,一返嚟就有個朋友邀請我去睇《猛男特囧》首映禮,我喺首映禮嘅after party度,識咗我之前嘅經理人,佢問我係咪有興趣入行,其實成件事好搞笑,因為我嗰時好緊張,第一次出席呢啲場合,我成個人柄埋咗一邊,攞住杯暖水諗緊走唔走好呢,我都唔知自己喺度做乜嘢。嗰時我之前嘅經理人走過嚟同我傾偈,傾傾吓覺得原來我係想做演員,覺得我呢個人幾有趣,跟住就簽咗畀佢。」

2017年正式出道拍第一齣電影《我們的6E班》,娛樂圈這份工作,是陳欣妍人生的第一份長工。陳欣妍說,如果沒有入行,她可能會像大學同學般,打一份廣告行業工。她說試過在一些商業拍攝時,撞見自己的大學同學,但同學變成客戶,自己為同學宣傳,感覺很奇妙。「我細細個都算有表演慾,但係我嗰種表演慾係我唔敢話畀人聽我有表演慾。由細到大我唔算多嘢講,我會自己匿喺房睇戲,幻想吓如果我係個女主角會係點,又或者自己匿喺被竇入面,可能扮下一場戲,講下女主角嘅對白,真係冇諗過自己會入行!」喜歡演戲,但為人熟悉卻是由綜藝節目《美女郊遊遊》開始,也是她千算萬算也計不出來的事,「我最鍾意都係做返一個演員,唔理電影定電視劇,但係突然之間有機會畀我去咗綜藝!」

陳欣妍拍完電影《我們的6E班》後,曾獨自到北京電影學院進修,「如果我呢一世嘅職業,我真係想做演員做一世,我個人唔鍾意換來換去,我覺得我想做一樣嘢,我需要好長時間去慢慢將件事做好,我覺得我好需要去進修一下,所以嗰時我有空檔咪走咗去北京電影學院讀咗幾個月,我都有搵唔同嘅老師去學戲,我覺得自己好需要!」

待在北京的三個多月,生活從未如此規律過,「我到𠵱家都係好掛住嗰種感覺,同緊一班真係有夢想嘅後生仔,大家都有唔同故事,有時夜晚聽佢哋講,有啲人可能係辭職突然之間走咗過嚟上堂,你會覺得有好多同路人一齊!」

今個月第一次畀家用

最難忘的排戲生活,是導師安排了一個真人騷劇場,陳欣妍獲派的角色是演一個情婦,然後到老師的一個朋友經營的餐廳,要當眾向那位老闆朋友「兜巴星」,「要整蠱個餐廳老闆,我要扮佢嘅情婦,因為嗰間餐廳好多人食緊飯,我行入餐廳然後講一啲對白,跟住就冚佢一巴。」

越講越興奮,陳欣妍還有一樣開心事,就是今個月開始終於可以有家用給父母,「呢個係好開心,我入咗行咁耐,今個月係我第一個月可以畀家用,幾多就唔好講,總之係心意,有得畀已經係一個好大進步!我呢個人真係唔係好叻理財,我對金錢冇一個好大嘅概念,所以我都係將啲錢畀完家用之後就擺喺經理人度,我叫佢每一日畀我,我要搭車、食飯呢啲零用錢。」

最常聽見的例子是戶口剩99蚊,想提款都難,陳欣妍說試得多,「我諗喺呢一年之前都經常係呢一個狀態,我又冇話好唔開心,我覺得呢種感覺好激勵性,好似發生喺漫畫情節先有,我反而覺得好勵志好熱血,雖然係餐餐清,但係我哋都要做得更好,因為你唔會差得過嗰時,反而冇壓力,你以後遇到嘅情況都唔會差得過嗰時,反而係一個激勵!其實我平時唔係話咁大花費,我每個月最大支出應該係交通,然後就係食飯。(買名牌?)真係比較少,因為你個收入咁樣,你唔會突然之間有呢方面支出囉!」

陳欣妍家有父母和胞妹,妹妹正在澳洲留學,她說家庭屬小康之家,小時父母關係不佳,到近年父親由美國退休回來,才和母親關係變好,「我都唔知點講佢哋點解會好返,我諗每一個家庭,家家都有本難唸的經,一定係有小磨擦,我諗我嘅父母都喺我嘅成長裏面,佢哋自己都各自學習緊一個家庭應該係點樣,或者兩公婆溝通方式,佢哋自己都進步緊呢件事,𠵱家緣份又到,所以又好返,我自己好開心!我細個以為佢哋分開,之後爹哋就去咗美國做嘢,好耐都冇返嚟,之後我媽咪先至同我講,其實冇離婚㗎,所有嘢都發生喺今年,爹哋今年退休返嚟跟住大家又好開心。」

讀女校出身的陳欣妍,大學年代才初戀,至今只拍過三次拖,其中一段戀情就曾和JW的有米男友、卓悅太子爺葉韋彤一起,現任男友則是拍拖兩年,因為合作《狼人遊戲》而撻着的沈震軒。小時候見識過父母的鬧交場面,多少令陳欣妍對婚姻有不同睇法,「我覺得影響係有,唔係驚咗,至少我覺得要成熟啲面對婚姻,唔會話好似童話故事糖衣一樣,因為生活唔係只得糖,婚姻入面應該有乜嘢責任,或者應該點樣相處令到大家都舒服。學識咗愛自己,你先可以有能力去愛人!」

【後記】3吋小強

問陳欣妍覺得自己有甚麼比其他人更勝一籌,她說:「我個人比較儍大姐,你話我點樣去stand out我真係冇乜點去諗,我係想保持一樣嘢,唔係話要保持一樣咁儍,我想保持返我嘅初心囉!」甚麼初心呢?「我真係想做一個演員。」

關於陳欣妍,還有一條3吋鼻涕令人印象深刻,在《美女郊遊遊》其中一集,她要在峽谷上玩飛索,本身畏高的她嚇到腳軟兼爆喊,在鏡頭前流下一條3吋鼻涕吊吊揈。

峽谷上玩飛索唔驚就假,反而在影樓現場,陳欣妍忽然指着地下,發現一隻差不多有3吋長的「小強」出現時,沒有𠵱嘩大叫,沒有驚嚇鼻涕流出!

化妝、造型:Yumiada Ling

服裝提供:voltage store

娛聞樂陪你走遍全球追星,即Like「娛果」FB 專頁!
BannerBanner