【氣質女神】蘇皓兒獨愛健碩男 點名鍾情小方夠陽光

更新時間 (HKT): 2020.08.19 00:00

這年頭的娛樂圈,「女神」一詞氾濫成災,在P圖濾鏡變成日常後,能以真面目示人,氣質外形稱得上是「女神」,在圈中可謂買少見少。

今年26歲的蘇皓兒(Chloe),初出道以一把清純秀髮俘虜一眾宅男,被冠以「翻版周慧敏」稱號,兩年前失驚無神將長髮剪短,加上早前其有份主演的大台劇出街,短髮look加校服誘惑,不但令異性着迷,就連同性亦受落,在「玉女」銜頭上,順理成章又加多一個「氣質女神」的美譽。

【當羅天宇做波友】

日前Chloe接受《蘋果》訪問,曾經是王宗堯女友的她,單身後承認工作量大增,早前她和有「女神收割機」之稱的羅天宇傳緋聞,似乎事業愛情兩得意。對此Chloe認真地說:「完全feel唔到佢(羅天宇)追我,因為大家喺呢方面都冇咩意思,只係一齊打籃球,大家純粹係隊友。」她自言單身有單身好,畢竟26歲大個女,難得可以全情投入專注事業,感情事盡量放淡一些,亦不覺身邊有追求者。「我唔覺自己喺呢方面遲鈍,事實真係冇人追,可能今年命水係少咗啲桃花或者多咗啲假桃花啦。」

【小方奪螢幕初吻】

有「女神」的外在條件,Chloe對異性package自然有要求,她笑言現時見到靚仔依然「心心眼」,除了外形要出眾,性格、嗜好同樣重要,圈中符合Chloe要求的,她點名有一個:「小方(方力申),因為佢屬運動型,夠健康陽光,以前鍾意呢個type,而家一樣咁鍾意。」事實上,4年前同屬一間公司的Chole和方力申,的確傳過緋聞,當時剛和Stephy分手的小方,「近水樓台」主動邀小師妹Chloe拍MV,Chloe還為對方獻上自己的螢幕初吻。現時反正大家都是單身,記者打趣問Chloe,和小方可有發展機會,她即笑笑說:「拍拖又冇諗過,不過可以吸引到我嘅男仔,鍾意做運動好緊要,因為大家有共同興趣,捉到我出街順便可以拍拖,我覺得幾好。」Chloe還說年紀大自己一截不成問題,最重要是大家傾到偈,在配對遊戲上,今年剛過4字頭的小方,無疑是Chloe的理想男友人選。

【窮到撳唔出錢】

Chloe當年以14歲之齡,參加校花校草選舉,繼而以model身份出道,20歲成為女子組合As One成員之一。現時組合解散,在旁人眼中,Chloe相比其他成員,發展似乎是最順暢一個,可是,Chloe在入行初期,和大部份新人一樣,同樣捱過不少辛酸,最窮時,銀行戶口連100蚊都冇。「啱啱入行做model嗰陣,工作唔穩定,又唔好意思問屋企人攞零用錢,所以銀包長期冇錢,最窮嗰陣,銀行直情撳唔出錢。記得有次要過海做單job,個job有千幾蚊酬勞,我嗰日就要搭地鐵去上環,見八達通得番幾蚊,唔夠來回程,咁我數定散紙,諗住去嗰程畀散紙,回程先用八達通,點知入機嗰陣,張10蚊紙太皺部機唔收,嗰刻好徬徨,又趕時間,好彩隔籬舖個老闆見到,同我換咗張10蚊紙,我先過到海。」

【一個飯盒食兩餐】

只屬小康家的Chloe,即使現時收入比之前多了,但慳家本色依然。她說:「盡量不必要嘅使費都會慳嘅,好似一盒飯食唔晒,會攞返屋企分兩餐食,只要唔臭或者唔太頹嘅都OK啦。衫就冇得慳,始終要見人,搭車都冇得慳,因為化妝頭髮會溶晒,到時再要搵人化過仲嘥錢。」Chloe透露自己亦有買有儲蓄成份的保險,盡量逼自己儲錢。

採訪:王梓嫚

攝影:仇志德

攝錄:葉君海、馮嘉銘


-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新

iOS / Android

娛聞樂陪你走遍全球追星,即Like「娛果」FB 專頁!
BannerBanner