【刷存在感】過氣歌手李國祥 拍片疑寸葉德嫻係「老懵咗前輩」

更新時間 (HKT): 2020.08.24 23:49

90年代、過氣歌手李國祥,不時會喺自己FB發表愛國偉論,日前佢又拍咗條十九幾分鐘嘅短片,講下自己愛國之情,當中仲牽涉到一位曾經撐年輕、支持反送中嘅圈中前輩,李國祥喺FB話:「老懵咗前輩,為咗補償自己嘅缺失,屈香港欠年輕人好多? 」

影片一開始,李國祥就已經講,話見到一位自己好鍾意嘅前輩,當年為佔中市民發聲,已經覺得好愕然:「當時未有去深究,以為係外國勢力,我嗰時叫佢做老懵咗。但係黑暴之後,佢仲不斷出嚟,我就開始了解佢嘅情況,其實佢今次點解令大家咁憤怒?就係因為佢話『上一代嘅人欠咗年輕人好多嘢』。」

對於呢位前輩所講「上一代嘅人欠咗年輕人好多嘢」,李國祥就擅自揣測係因為對方年紀大,加上仔女唔喺身邊,所以先有呢個感覺,繼而企喺年輕人嗰邊搵認同,李國祥話:「佢正正係覺得自己被遺棄,佢諗返點解啲仔女唔理佢,佢會覺得自己以前做得唔夠好,做得唔足夠。我覺得老懵咗前輩真係因為內心嘅缺失,年輕嘅時候冇為佢嘅子女付出足夠時間、關心,所以覺得要補償畀啲年輕人,就將自己嘅過失賴咗落去其他人度。」

除咗寸前輩係「老懵咗」外,李國祥又踩現今嘅年輕人係「塞滿知識嘅白癡」,話佢哋除咗讀書以外,就咩都唔識:「你問佢哋啲菜點樣出嚟,點樣煮都唔知。」條片上載到FB後,有唔少網民鬧爆李國祥為咗刷存在感咩都講得出,之後李國祥再出一個文字post,除咗話鬧佢嘅網民係曱甴、暴徒外,又多謝出嚟撐佢嘅藍絲:「請大家不要為曱甴生氣,狗吠其實唔需要聽。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於 《蘋果日報》你的優惠 網上獨家發售!

娛聞樂陪你走遍全球追星,即Like「娛果」FB 專頁!
BannerBanner