【提名人肥媽好開心】出爐冠軍謝嘉怡吹喇叭慶祝 落選源菲然原來係表妹

更新時間 (HKT): 2020.08.31 17:23

2020年香港小姐昨晚誕生,現年25歲、由肥媽(Maria Cordero)提名的混血兒謝嘉怡(Lisa)以大熱姿態奪冠軍寶座,謝嘉怡同時兼奪「最上鏡小姐」,成雙料冠軍,至於亞軍是23歲陳楨怡,季軍是22歲的郭柏妍。

父親是香港人、媽咪是蘇格蘭人的謝嘉怡,賽前許下的生日願望是攞冠軍,結果真的願望成真。她賽後分享得獎感受說:「好開心好shock,估唔到會贏。你哋睇返電視,我贏完行咗去,其實我選都係想攞個experience好過贏獎。」謝嘉怡表示雖未能及時跟在場支持父親傾偈,但估計父親一定很開心。她透露會留港發展,未來目標是學好廣東話及拍劇。昨晚謝嘉怡獲獎後還未繞場一周便走落台,結果被司儀叫住,問可擔心蝦碌被人取笑時,她笑說:「唔怕,笑咪笑囉,佢哋開心我咪開心。」

謝嘉怡提到五強環節在台上講感受,透露父親在她未學行已希望她參加港姐,謝嘉怡承認是真人真事,自己17歲已叫她返港參選,但由於她家人全部在外地,所以不想回來選美,直至長大才返港。問到如何慶祝時?謝嘉怡說:「我而家真係好肚餓,好想食魚蛋、燒賣同排骨飯、叉燒飯。」亞軍陳楨怡表示對賽果滿意,自己從沒想過入三甲,所以也不會感到失望,自己一直覺得謝嘉怡表現好和發揮好,屬實至名歸。至於郭柏妍昨晚在司儀宣佈她獲季軍時面色一沉,但事後她受訪時聲稱未能奪冠未有失望,參賽都是想挑戰自己,可覺得自己落敗原因?她說:「可能無謝嘉怡咁風趣幽默,覺得佢好得意、好真,好努力學中文。」

換上便服的謝嘉怡今日凌晨12時半乘黑色七人車離開無綫將軍澳電視城,返回下榻的香港九龍東智選假日酒店,問她獲獎得最想做甚麼時,她笑說:「最想食同埋瞓覺。」問心情可平伏時,鬼妹仔謝嘉怡不明「平復」意思,記者解釋後她說:「少少,頭先同Rosita(郭柏妍)講我自己好shock同埋好surprise,我都仲未好believe到。」原來謝嘉怡父親與親友早在酒店等候,而同屆落選港姐源菲然原來是謝嘉怡表妹,她也在場為表慶祝。謝爸爸看來甚年輕,他送上鮮花賀女兒奪冠,而謝嘉怡更即場吹喇叭飲香檳和食排骨飯慶祝,食得十分開心。

肥媽是謝嘉怡提名人,《蘋果》今日聯絡肥媽,她表示有看謝嘉怡比賽,戥世姪女開心:「佢做得好好吖,講得好natural,事實係佢爸爸想佢參加,幾年前佢爸爸叫我提名,但佢唔肯,想讀完書,想讀埋nurse先至參加之嘛!」肥媽指昨晚有睇謝嘉怡比賽,看她初時表現,以為不會奪冠,直至最後問題部份表現自然,令人對她大大加分。問肥媽可有忠告給入行的謝嘉怡?肥媽說:「佢個人咁真,佢keep佢嘅純真、佢嘅natural就得㗎啦。」肥媽丈夫Rick 3年前不幸罹患肺腺癌末期,早前又患上肺炎和血管閉塞,要留院醫治,肥媽要照顧老公,加上謝嘉怡返港後要隔離,所以肥媽一直未有機會跟她見面,肥媽說:「我要陪我先生,所以幫唔到佢(謝嘉怡),佢好叻女,靠自己。佢又孝順又簡單,keep it natural就最好。」

幾位出爐港姐今日出席活動,謝嘉怡指爸爸知道她奪冠軍十分開心,自己食了想食的排骨飯,十分滿足。講到源菲然是她表妹,二人一直十分保密,謝嘉怡說:「我哋兩個都想參選,我覺得唔係好緊要(公開),我有34個cousin,我唔會講佢哋做乜嘢。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於 《蘋果日報》你的優惠 網上獨家發售!

娛聞樂陪你走遍全球追星,即Like「娛果」FB 專頁!
BannerBanner