【輔導員】Sammi擔當Twins啦啦隊 以抑鬱過來人給予鼓勵

更新時間 (HKT): 2020.09.08 06:00

由潘源良執導、改編自莊梅岩同名舞台劇的《聖荷西謀殺案》,是一套心理懸疑劇,電影版找來鄭秀文(Sammi)與蔡卓妍(Sa)主演,以美國聖荷西作背景,故事講述Sammi與佟大為這對夫妻看似過着美滿生活,直至飾演Sammi好姊妹的阿Sa因情困到當地探望,在一同居住的5天裏,阿Sa揭露了他們背後隱藏着的秘密,因為人性的猜疑與嫉妒,有人動了殺機。早前Sammi與阿Sa一同接受訪問,提到電影細緻描繪了女人複雜的內心世界,甚少擔演亦正亦邪角色的Sammi坦言今次是被劇本吸引接拍,她說:「都算突破,角色本身有一個空間同層次畀我表達唔一樣嘅演出,歸根究柢要多謝個劇本,呢個角色好立體,亦正亦邪、亦善亦惡,喺過去嘅愛情小品入面未見過鄭秀文有呢類演出,人生經驗豐富咗,演繹呢個角色再有多啲說服力。」拍攝時Sammi增肥10磅,希望在愛情戲上令大家感到有別於舞台上的自己,Sammi說:「有一場要除咗衫見到啲肉震震吓,我反而鍾意喎,呢個年紀唔鍾意自己好瘦,做運動係維持肌肉嘅感覺,飲食健健康康,運動正常,好難會好肥,階段唔同咗,我覺得有啲肉嘅女士好好睇。其實場love scene對我嚟講都少少大膽,拍嘅時候除剩個bra,其實我成日做運動都剩係着個bra top,好自然,冇乜尷尬。」

今次要演繹是陰暗兼對愛情執悟的角色,令Sammi發現了多面的自己,她說:「我本身同角色反差比較大,佢愛恨都強烈,但係唔同嘅事放喺唔同人身上,處理都唔一樣,最重要係你點去睇嗰段關係,角色對愛情嘅恨好強烈,我自己就唔係,喺愛裏面唔好選擇咁強烈嘅恨,咁會帶嚟好大嘅傷害同埋痛苦,我自己嘅宗教信仰好幫助到我處理好多事情。」

繼2003年合作《戀上你的床》後,Sammi與阿Sa再結片緣,她們由前輩後輩的關係,進化為好朋友,Sammi說:「第一次合作,除咗Hi同Bye都唔知講乜嘢,差啲要問佢飲咗奶未。真係睇住阿Sa大,而家喺呢行嘅經歷都唔係淺,都傾到偈,雖然食咗防腐劑,但係有少少意外嘅係佢個人係成熟過佢嘅外表,講嘢都顧及人哋感受,同佢合作係好舒服。」阿Sa則說:「我嗰陣時係新人,比較害羞啲,冇咁多勇氣同前輩講嘢,而家就成熟啲,嗰陣時都唔知傾乜嘢,冇嘢好講,因為一講嘢就露底。佢唔單止係合作嘅好,嗰陣時大家唔係好熟,自己面對唔係好開心嘅時期,佢睇新聞知道後,會透過朋友攞咗我嘅電話,傳短訊畀我,我覺得好好,好窩心。」曾經經歷抑鬱,Sammi明白身邊人會經歷不快,會願意以過來人身份去分享自己的感受並給予鼓勵 ,Sammi更爆阿Sa與阿嬌曾經到她的家裏作客,她會擔當「輔導員」跟她們 傾心事,笑言自己是Twins的啦啦隊。

場地:香港維港凱悅尚萃酒店

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於 《蘋果日報》你的優惠 網上獨家發售!

娛聞樂陪你走遍全球追星,即Like「娛果」FB 專頁!
BannerBanner